सुरक्षा दिने प्रहरीबाटै नागरिक असुरक्षित ?

काठमाडौं । प्रहरीको काम आमनागरिकलाई सुरक्षाको प्रत्याभूति गराउने हो । तर, हालैको एक घटनाले भने प्रहरीबाटै पनि नागरिक असुरक्षित छन् भन्ने देखाएको छ ।

घटना चितवनको हो । त्यहाँ एक प्रहरीले एक जना युवकमाथि निर्घात कुटपिट गरेको भिडिओ अहिले सामाजिक सञ्जालमा भाइरल भइरहेको छ । भिडिओ अहिले सार्वजनिक भए पनि घटना केही समयअगाडिको रहेको एक उच्च प्रहरी अधिकारीले दाबी गरे ।

मोटरसाइकल चेकिङ गरिरहेका बेला प्रहरीले ‘फोन गर्ने ?’, ‘माथिको पावर देखाउने ?’ भन्दै युवकलाई कुटपिट गरेको देखिन्छ ।

प्रहरीले युवकलाई लात्तीले हान्दै भुइँमा लडाएर निर्घात कुटपिट गरेको भिडिओमा देखिएको छ ।

जिल्ला प्रहरी कार्यालय चितवनले समिति गठन गरेर घटनाको छानबिन सुरू गरिएको जनाएको छ । डीएसपी ज्ञानकुमार महतोको नेतृत्वमा घटनाको छानबिन सुरू भएको हो ।