खराब कर्जा बढ्न थालेपछि वाणिज्य बैंकका सीईओसंग छलफल गर्दै राष्ट्र बैंक

काठमाडाैं । नेपाल राष्ट्र बैंकले आज बैंकका प्रमुख कार्यकारी (सीईओ)सँग छलफल गर्ने भएको छ।

राष्ट्र बैंकको बैंक तथा वित्तीय संस्था नियमन विभागले सोमबार तीन बजे याक एण्ड यती होटलमा बैंकका प्रमुख कार्यकारीहरुसँग छलफल गर्ने भएको हो।

ऋण उठ्न छाडेर अवस्था असहज बन्दै गएपछि बैंकले वाणिज्य बैंकहरुसँग छलफल गर्ने तयारी गरेकाे हाे।

नियमन विभागले ‘समसामयिक बिषयमा’ भन्दै प्रमुख कार्यकारीहरुलाई निम्तो पठाएको छ।

कार्यक्रममा राष्ट्र बैंकका गभर्नर महाप्रसाद अधिकारी, डेपुटी गभर्नरहरु पनि उपस्थित हुने छन्।

नियमन विभागले पावर पोइन्ट प्रिजेन्टेसन दिने छ भने सुपरिवेक्षण विभागका तर्फबाट पनि बैंकहरुको अवस्था र अभ्यासका बारेमा टिप्पणी गरिने छ।

त्यसपछि सीईओलाई बोल्न दिइने छ। बैंकरले मूलत: खराब ऋण बढेको, यसले समस्या डरलाग्दो बनाउँदै लगेको र यसलाई समाधान गर्न राष्ट्र बैंकले नरम नीति लिनुपर्ने धारणा सार्वजनिक गर्ने तयारी गरेका छन्।

छलफलमा गभर्नर, डेपुटी गभर्नर, नियमन तथा सुपरिवेक्षण विभागका कार्यकारी निर्देशकहरु लगायतको उपस्थिति हुने बताईएको छ ।