बाइडेन किन जाँदैछन् जर्मनी ?

एजेन्सी । अमेरिकी राष्ट्रपति जो बाइडेन बिहीबार रुसविरुद्ध युक्रेनको बढ्दो निराशाजनक लडाइँलाई बलियो बनाउन सहयोगीहरूसँग वार्ता गर्न जर्मनीको द्रुत बिदाइ यात्रामा निस्केका छन् ।

इजरायलले हमास प्रमुख याह्या सिनवारलाई गाजामा सैन्य कारबाहीमा मारिए कि भनेर अनुसन्धान गरिरहेको बताएपछि बाइडेनले मध्यपूर्वमा बढ्दो सङ्कटबारे पनि छलफल गर्ने अपेक्षा गरिएको थियो ।

बर्लिनको २४ घन्टे छोटो भ्रमणमा बाइडेनले जर्मन चान्सलर ओलाफ सोल्ससँग भेट गर्नेछन् । त्यसपछि उनीहरू दुवैजना फ्रान्सेली राष्ट्रपति इम्यानुएल म्याक्रोन र बेलायती प्रधानमन्त्री केइर स्टार्मरसँग वार्तामा सामेल हुनेछन् ।

युक्रेनका राष्ट्रपति भोलोदिमर जेलेन्स्कीसँग बैठक र किएभका सहयोगीहरूको प्रमुख शिखर सम्मेलनमा सहभागी हुन बाइडेन मूल रूपमा गता साता जर्मनीको बहुदिने भ्रमणमा जान लागेका थिए तर फ्लोरिडातर्फ मिल्टन आँधी अघि बढेपछि उनले भ्रमणलाई स्थगित गरेका थिए ।

ह्वाइट हाउसले भनेको छ, “प्रमुख नाटो सहयोगी जर्मनीको छोटो पुनः तालिकाबद्ध भ्रमणले अमेरिका र जर्मनीले सहयोगी र मित्रका रूपमा साझा गरेको नजिकको सम्बन्धलाई थप बलियो बनाउनेछ र रुसी आक्रमणविरुद्ध युक्रेनको रक्षा तथा मध्यपूर्वका घटनाहरू समावेश भएका भू–राजनीतिक प्राथमिकताहरूमा समन्वय गर्नेछ ।”

यस वर्षको प्रारम्भमा रुससँग कैदी आदानप्रदान सम्झौता सहज बनाउन सहयोग गरेकामा सोल्सलाई धन्यवाद दिन पनि भ्रमण गर्न बाइडेन उत्सुक भएको अमेरिकी अधिकारीहरूले बताएका छन् । उक्त सम्झौताअन्तर्गत अमेरिकी पत्रकार इभान गेर्शकोभिच मुक्त भएका थिए ।

यद्यपि बाइडेनको ध्यान युक्रेनमा केन्द्रीत हुनेछ । सन् २०२४ जुलाईमा ह्वाइट हाउसको दौडबाट बाहिरिएका बाइडेन कार्यालयको अन्तिम तीन महिनामा किएभका लागि पश्चिमी सैन्य सहायता एकीकृत गर्न उत्सुक छन् । युद्ध सुरु भएको साढे दुई वर्षभन्दा बढी भइसक्दा किएभ विस्तारै स्थिर रूपमा आफ्नो पूर्वी डोनबास क्षेत्रमा भूमि गुमाइरहेको छ र बाहिर निस्कने रणनीति बनाउने बढ्दो दबाबमा छ । युक्रेनले पश्चिमी समर्थन बढाएर रणनीति सुरु हुनुपर्ने बताएको छ ।

बाइडेनले बुधबार युक्रेनका राष्ट्रपति जेलेन्स्कीसँगको फोन वार्तामा युक्रेनका लागि हवाई सुरक्षामा बख्तरबन्द वाहनहरूसहित चार अर्ब ४२ करोड ४५ लाख डलरको नयाँ हतियार प्याकेजको घोषणा गरेका थिए । सन् २०२२ को रुसी आक्रमणविरुद्धको युक्रेनको लडाइँमा अमेरिका सबैभन्दा ठूलो सैन्य सहायता प्रदायक हो । त्यसपछि दोस्रोमा जर्मनी रहेको छ ।