शिक्षकको आन्दोलन, गुम्यो महानगरको राजश्व !

काठमाडौं । आज काठमाडौंमा शिक्षा ऐन जारी र विगतका सम्झौता कार्यान्वयनको माग राख्दै शिक्षकहरूले गरेको प्रदर्शन फोहोर नगरि, कुनै संरचना नभत्काइ गरेका छन् । यसरी भएको आन्दोलनलाई काठमाडौं महानगरपालिकाका मेयर बालेन्द्र शाह (बालेन) ले धन्यवाद दिएका छन् ।

धन्यवाद दिँदै उनले महानगरले जरिवाना नखोजी चेतना खोजेको उल्लेख गरेका छन् । ‘सार्वजनिक सम्पति पनि आफ्नै सम्पति हो भनेर त्यसलाई जोगाउने चेतनशील समाजको निर्माण गर्न खोजेको हो,’ बालेनले भनेका छन्, ‘यहि शिक्षा तपाईंले आफ्नो विद्यार्थीहरूलाई पनि दिनुहोला । हामी सबै मिलेर चेतनशील समाजको निर्माण गरौँ । तपाईहरू त झन् शिक्षक हुनुहुन्छ, तपाईंहरूको त झन् ठूलो जिम्मेवारी र भूमिका छ यसमा ।’

बालेनले लेखेका छन्, ‘कृपया, आफ्नो कुरा राख्नलाई चेतनशील भएर विद्यार्थीहरूको पढाइ नबिगारी कार्यक्रम गरिदिनुहोला । गाउँ गाउँमा सिंहदरबार भन्ने त नारा मात्र भयो । आशा छ एकदिन आफ्नो अधिकारको लागि काठमाडौं धाइरहनु नपरोस् ।’

यसरी फोहोर गर्ने, वातावरण प्रदुषण गनेंलाई महानगरले फोहोर मैला व्यवस्थापन ऐन २०६८ र काठमाडौं महानगरपालिको आर्थिक ऐन २०८१ बमोजिम १ लाख रुपैयाँ जरिवाना गर्ने गरेको थियो ।