सरकारको सकारात्मक प्रयासमा निजी क्षेत्र सधैँ साथमा छ : भवानी राणा (भिडिओ)

'कर्पोेरेट बिजनेश अवार्ड' मनोबल खस्किएको बेला निजी क्षेत्रलाई उत्साह र प्रेरणा हो

काठमाडौं । नेपाल उद्योग वाणिज्य महासङ्घकी पूर्वअध्यक्ष भवानी राणाले सरकारको सकारात्मक प्रयासमा निजी क्षेत्रको सधैँ सहयोग रहने बताउनुभएको छ ।

बिहीबार लाजिम्पाट काठमाडौंस्थित र्‍याडिसन होटेलमा कर्पोरेट मिडिया ग्रुपले आयोजना गरेको १७औँ संस्करणको ‘कर्पोरेट बिजनेश अवार्ड, २०२५’ समारोहमा बोल्नुहुँदै उहाँले देशको पर्यटन प्रवर्द्धनका लागि भइरहेका सरकारी प्रयासमा निजी क्षेत्रको साथ रहने बताउनुभएको हो ।

राणाले पर्यटनमा केही सुधार भए पनि दुई ठूला विमानस्थल (पोखरा र भैरहवा) अपेक्षित तवरले सञ्चालन हुन नसक्दा बाधा पुगिरहेको बताउनुभयो ।

‘पयर्नटनमा पनि केही सुधार त भएका छन् । तर, दुई ठूला एअरपोर्टहरूमा प्लेन सञ्चालन गर्न सकियो भने अझ राम्रो हुन्थ्यो,’ उहाँले भन्नुभयो, ‘त्यसका लागि सरकारले पनि प्रयास त गरिरहेकै छ । निजी क्षेत्रबाट पनि हामीले गरिरहेका छौँ । हालै सम्पन्न ‘इन्डो–नेपाल ज्वाइन्ट फोरम’ को मिटिङमा पनि हामीले यो सुझाव राखेका थियौँ ।’

त्यसैगरी, नेपालमा पुग्दो राष्ट्रिय ध्वजावाहक जहाज नरहेको र थप दशवटा राष्ट्रिय ध्वजावाहक ल्याउन सके नेपाल आउने पर्यटकले तिर्नुपरिहेको महँगो भाडादरलाई प्रतिस्पर्धी बनाउन र पर्यटन पनि सोचेजस्तै गरी अगाडि बढाउन सकिने विचार उहाँले राख्नुभयो । यसमा चीन र भारतले सहयोग गरे नेपालको पर्यटन र व्यवसाय दुवै क्षेत्रको प्रवर्द्धन हुने उहाँको मत छ ।

उहाँले अहिलेको अवस्था निजी क्षेत्रका लागि अफ्ठ्यारो रहेको बताउँदै सरकारले ल्याएका कानुनको कार्यान्वयनमा जोड दिनुभयो ।

र्हेनुहोस् भिडिओ–

‘अहिलेको अवस्था निजी क्षेत्रको लागि अफ्ठ्यारो छ । हुन त सरकारले हामी निजी क्षेत्रकै सल्लाह–सुझाव लिएर पाँचवटा कानुन बनाएको छ । त्यसले निजी क्षेत्रलाई उत्साहित गरेको पनि छ र हामीले यसको स्वागत पनि गरेका छौँ,’ उहाँले भन्नुभयो, ‘तर, कार्यान्वयन पक्ष भने धेरै नै फितलो छ । बनेका राम्रा कानुनहरू कसरी कार्यान्वयन गर्न सकिन्छ भन्नेमा ध्यान दिन जरुरी छ ।’

पूर्वअध्यक्ष राणाले विश्व बैंकले हालसालै आउने वर्ष नेपालको कुल गार्हस्थ्य उत्पादन (जीडीपी) ४.५ देखि ९ प्रतिशतसम्म बढ्न सक्ने प्रतिवेदन सार्वाजनिक गरेको प्रसङ्ग निकाल्दै  यसका लागि कृषि र जडीबुटीलाई उद्योगका रूपमा विकास गर्नुपर्ने बताउनुभयो ।

‘घरेलु उपभोगका कुराहरू, कृषि र जडीबुटीलाई कसरी मूल्य अभिवृद्धि उद्योगतर्फ लैजान सकिन्छ, यी कुरामा हामी र राज्यले अझ लगानी गर्न सकियो भने जीडीपी प्राप्त गर्नका लागि सजिलो हुन्छ भन्ने विश्व बैंकले सुझाएको छ । हामीले ऊर्जामा फड्को मारिसकेका छौँ, अझ राम्रो हुँदैछ । राष्ट्रिय योजना समयमा सम्पन्न नहुने, विकास खर्च भनेजस्तो नहुने कुराहरूलाई सुधान गर्न सकियो भने आउने दिनहरू साँच्चै राम्रा हुन सक्छन् ।’

यस्तै, ‘कर्पोरेट बिजनेश अवार्ड’ को छनोट समिति संयोजकसमेत रहनुभएकी उहाँले ‘कर्पोेरेट बिजनेश अवार्ड’ निजी क्षेत्रलाई उत्साह र प्रेरणा रहेको बताउनुभयो । मनोबल खस्किएको बेला यसले उद्योगी व्यवसायीलाई उत्साह र प्रेरणा मिल्ने बताउनुभएको हो ।

‘कर्पोरेट बिजनेश अवार्डले निजी क्षेत्रलाई उत्साह र प्रेरणा प्रदान गर्छ । खासगरी उद्यमशीलतामा लाग्नुभएका युवाहरूलाई यसले काम गर्ने विश्वास प्रदान गर्छ,’ राणाले भन्नुभयो, ‘अहिले उद्योगी व्यवसायीको मनोबल खस्किरहेको बेलामा यस्ता अवार्डहरू चाहे त्यो निजी क्षेत्रले गरोस् वा सरकारले, यसले अवश्य नै हामी उत्साहित हुन्छौँ ।’

नेपाल उद्योग वाणिज्य महासङ्घको अध्यक्ष हुँदा आफूले पनि कर्पोरेट बिजनेश अवार्ड पाएको स्मरण गर्दै राणाले कठिन परिस्थितिमा पनि उद्योग व्यवसायलाई निरन्तरता दिएर अवार्डमार्फत सम्मानित हुनुहुनेहरूलाई बधाई व्यक्त गर्नुभयो । साथै, अवार्ड आयोजक कर्पोरेट मिडिया ग्रुपलाई निजी क्षेत्रको तर्फबाट धन्यवाद व्यक्त गर्नुभयो ।

यी समाचारहरू पनि पढ्नुहोस्–

हाम्रो शब्दकोशमा ‘उद्योगी–व्यवसायी’ भनेका राष्ट्रसेवक हुन् : अध्यक्ष उज्वलजंग शाह (भिडिओ)

कर्पोरेट बिजनेश अवार्डबाट उद्योगी–व्यवसायीहरू सम्मानित, कुन सम्मान कसले पाउनुभयो ?

आईजे ग्रुपका अध्यक्ष श्रेष्ठले पाउनुभयो ‘कर्पोरेट लाइफटाइम एचिभमेन्ट अवार्ड’, को हुनुहुन्छ उहाँ ?

लाइफटाइम अचिभमेन्ट अवार्ड पाएपछि रविभक्त : विदेशी लगानी ल्याउन निजी क्षेत्रको कुरा सुन्नुपर्छ (भिडिओ)

तीनकुने घटनाले देशको बेइज्जत गर्‍यो, उद्योगी–व्यवसायी आतंकित बने : रक्षामन्त्री राई (भिडिओसहित)

एक्लैले केही गर्न नसक्ने भन्दै कृषिमन्त्री अधिकारीले खोज्नुभयो निजी क्षेत्रको साथ (भिडिओ)