प्रधानमन्त्रीको भारत भ्रमणमा नेपालगञ्ज–नयाँ दिल्ली उडान अनुमतिलाई टुङ्गोमा पुर्‍याउनुपर्छ : भवानी राणा

काठमाडौं । नेपाल उद्योग वाणिज्य महासंघ (एफएनसीसीआई) की पूर्व अध्यक्ष भवानी राणाले नेपालगञ्ज–नयाँ दिल्ली हवाई उडानसम्बन्धी अनुमतिलाई टुङ्गोमा पुर्‍याउनुपर्ने बताएकी छिन् ।

नेपालगञ्ज–दिल्ली सिधा हवाई उडान सन्दर्भमा नेपाल उद्योग वाणिज्य संघ, बाँकेले आज काठमाडौंमा आयोजना गरेको सर्वपक्षीय छलफल कार्यक्रमलाई सम्बोधन गर्दै उनले प्रधानमन्त्री केपी शर्मा ओलीको आगामी भारत भ्रमणले नेपालगञ्ज–दिल्ली सिधा हवाई उडानको अनुमति प्रक्रियालाई टुङ्गोमा पुर्‍याउनुपर्ने बताएकी हुन् ।

सन् २०१८ मै भारतले उक्त रुटमा उडान अनुमति दिए पनि केही केही समस्याले उडान हुन नसकिरहेको उनले बताइन् । ‘पहिला पनि २०१८ सालमा भारतले उडान अनुमति दिने भनेर ‘अलाउ’ गरिसकेको थियो । त्यसलगत्तै हाम्रो बुद्ध एयरले जहाज उडाउन खोज्दा दिल्लीको विमानस्थलमा स्लट (उडान अवतरण वा उडान प्रस्थान गर्न पाउने अधिकारको समयावधि) पाइएन भन्ने कुरा सुनिएको थियो । त्यो स्लटहरूका लागि पनि
जीएमआरहरूले हामी पहल गर्छौं भनेर त्यहाँको निजी क्षेत्रले भनेका छन्,’ उनले भनिन् ।

जीएमआर भारतको विशेषगरी पूर्वाधार, उड्डयन, ऊर्जा र सहरी विकासको क्षेत्रमा काम गर्ने बहुराष्ट्रिय कम्पनी समूह हो ।

उक्त रुटमा हवाई अनुमतिका लागि आर्थिक कुटनीतिका अलावा राजनीतिक कुटनीति पनि जरुरी रहेको पूर्व अध्यक्ष राणाको भनाइ छ । ‘अहिले दुई देशबीच आर्थिकका साथै राजनीतिक ‘डिप्लोमेसी’को पनि जरुरी छ । त्यसका लागि भारत भ्रमणमा जाँदा नेपालगञ्ज–नयाँ दिल्ली हवाई उडान अनुमतिको विषयलाई उच्च प्राथमिकतामा राखिनुपर्छ भन्ने अपेक्षा हामी निजी क्षेत्रको छ,’ उनले भनिन् ।

यदि नेपालगञ्ज–नयाँ दिल्ली सिधा हवाई उडान सुरू गर्न सकिए मध्ये र सुदूरपश्चिम क्षेत्रको मात्र नभइ मुलुककै विकासको ढोका खुल्ने उनको भनाइ छ । नेपालगञ्जलाई भारतको मुख्य विमानस्थलसँग जोड्न सकिए समग्र पर्यटन विकासका साथै कृषि, जडीबुटी र ऊर्जा क्षेत्रको विकासमा पनि कोसेढुङ्गा सावित हुने उनले बताइन् । यसबाट समृद्ध नेपाल सुखी नेपालीको नारालाई सार्थक बनाउनसमेत सहयोग पुग्ने विश्वास उपाध्यक्ष राणाको छ ।

‘यदि हामीले नेपालगञ्ज–दिल्ली उडान गर्न सक्यौँ भने मुलुकको समग्र विकासमा नयाँ आयाम सुरू हुने विश्वास हामीलाई छ,’ उनले भनिन्, ‘नेपालगञ्ज उद्योग वाणिज्य संघको तर्फबाट, नेपालगञ्ज र बर्दियाबासीको तर्फबाट र नेपाल उद्योग वाणिज्य महासंघको तर्फबाट समेत यो कुरालाई ढिलो नगरीकन उच्च प्राथमिकतामा राख्न विशेष आग्रह छ । यो कुरालाई आउँदा दिनमा ढिला नगरीकन सम्भव बनाऔँ ।’

प्रधानमन्त्री केपी शर्मा ओलीको आसन्न भारत भ्रमणको अवसर पारेर नेपाल उद्योग वाणिज्य संघ, बाँकेले आज नेपाल उद्योग वाणिज्य महासंघको केन्द्रीय कार्यालय टेकुमा ‘नेपालगञ्ज–दिल्ली सिधा हवाई उडान सन्दर्भमा’ सर्वपक्षीय छलफल कार्यक्रम आयोजना गरेको हो । प्रधानमन्त्री ओली यही भदौ ३१ गते दुईदिने औपचारिक भ्रमणका लागि भारत जाँदै छन् ।