मुलुकको अर्थतन्त्र सुधार गर्न उपयुक्त मौद्रिक नीति आयो : भवानी राणा

काठमाडौं । नेपाल उद्योग वाणिज्य महासंघ (एफएनसीसीआई) की पूर्व अध्यक्ष भवानी राणाले आर्थिक वर्ष २०८२/८३ को मौद्रिक नीति मुलुकको अर्थतन्त्र सुधारमा सहयोग पुर्‍याउनेगरी आएको बताएकी छिन् ।

मौद्रिक नीतिमाथि सङ्क्षिप्त प्रतिक्रिया दिँदै उनले घर र शेयर कर्जामा अपनाइएको लचक नीतिले मुलुकको अर्थतन्त्रमा सकारात्मक प्रभाव पार्ने तथा सुधारको बाटो समात्ने बताएकी हुन् ।

मौद्रिक नीतिले बैंक, निक्षेप र नीतिगत दर घटाएको चर्चा गर्दै उनले यसबाट बजारमा तरलता व्यवस्थापन गर्न सहज हुने बताएकी छिन् । मौद्रिक नीतिमार्फत बैंक दर ६ दशमलव ५ प्रतिशतबाट घटाएर ६ प्रतिशत, निक्षेप दर ३ प्रतिशतबाट घटाएर २ दशमलव ७५ प्रतिशत र नीतिगत दर ५ प्रतिशतबाट घटाएर ४ दशमलव ५ प्रतिशत कायम गरिएको छ ।

यस्तै, घरकर्जामा अनुपात ८० प्रतिशत कायम गर्दै अधिकतम् सीमा तीन करोड रुपैयाँ निर्धारण गरिएको छ । विद्यमान नीतिमा यस्तो सीमा दुई करोड रुपैयाँ छ । यो नीतिले रियलस्टेटको क्षेत्रमा सञ्जीवनीको काम गर्ने पूर्व अध्यक्ष राणाको भनाइ छ ।

उनले शेयर धितो कर्जामा १५ करोड रुपैयाँको क्याप हटाएर २५ करोड रुपैयाँ पुर्‍याउनु पनि सकारात्मक भएको बताएकी छिन् । शेयर धितो कर्जामा आएको यो लचिलो नीतिले शेयरबजारमा सकारात्मक प्रभाव पर्नाका साथै मुलुकको अर्थतन्त्रमा समेत महत्त्वपूर्ण योगदान पुग्ने अपेक्षा उनको छ ।

त्यस्तै, मौद्रिक नीतिले साना तथा मझौला (एसएमई) कर्जाका सन्दर्भमा पनि महत्त्वपूर्ण सम्बोधन गरेको उनको भनाइ छ । मौद्रिक नीतिले चालु पुँजी कर्जासम्बन्धी मार्गदर्शनलाई कृषि, साना तथा घरेलु उद्योग, शिक्षा, स्वास्थ्य, खेलकुद, सञ्चार र मिडिया हाउसलगायतको व्यवसायको प्रकृति र कर्जा भुक्तानी–आम्दानी चक्रका आधारमा आवश्यकतानुसार परिमार्जन गर्ने नीति लिएको छ ।