बीएलसी होल्डिङ्सकी एमडी मेघा चौधरीलाई ‘वुमन बिजनेश अन्टरप्रेनर अफ द इयर अवार्ड’ (भिडिओ)

काठमाडौं । नेपालको औद्योगिक र आर्थिक क्षेत्रमा झण्डै डेढ शताब्दीदेखि योगदान पुर्‍याइरहेको व्यावसायिक समूह बीएलसी होल्डिङ्सकी प्रबन्ध निर्देशक मेघा चौधरीले ‘वुमन बिजनेश अन्टरप्रेनर अफ द इयर अवार्ड, २०२५’ प्राप्त गर्नुभएको छ ।

कर्पोरेट म्यागजिनले उहाँलाई सो अवार्ड प्रदान गरेको हो ।

बिहीबार काठमाडौंको लाजिम्पाटस्थित र्‍याडिसन होटेलमा आयोजित ‘कर्पोरेट बिजनेश अवार्ड, २०२५’ समारोहमा उहाँलाई सो अवार्ड प्रदान गरिएको कर्पोरेट म्यागजिनका संस्थापक सम्पादक उज्वलजंग शाहले जानकारी दिनुभयो ।

कार्यक्रमका प्रमुख अतिथि रक्षामन्त्री मानवीर राई, अवार्ड छनोट समिति संयोजक तथा नेपाल उद्योग वाणिज्य महासङ्घ (एफएनसीसीआई) की पूर्वअध्यक्ष भवानी राणा, कर्पोरेट मिडियाकी उपाध्यक्ष सुष्मा महरालगायतले उहाँलाई अवार्ड प्रदान गर्नुभएको थियो ।

मेघा चौधरी र बीएलसी होल्डिङ्सबारे

मेघा चौधरीलाई खासगरी चर्चित उद्योगपति बसन्त चौधरीकी छोरी भनेर चिनिन्छ । तर, सानैदेखि आफ्नो बुबाको साथमा रहेर तल्लो तहबाटै कामहरू गर्दै र सिक्दै अघि बढ्नुभएकी उहाँले नेपालको औद्योगिक क्षेत्रमा आफ्नै पहिचान स्थापित गर्नुभएको छ । त्यसैकारण उहाँ पछिल्लो समय नर्भिक इन्टरनेशल हस्पिटल एण्ड मेडिकल सेन्टरका साथै भुरमल लुनकरदास कङ्लोमेरेट (बीएलसी) होल्डिङ्सकी प्रबन्ध निर्देशक हुनुहुन्छ ।

प्रतिष्ठित औद्योगिक घरानाको पारिवारिक पृष्ठभूमिमा हुर्किनुभए पनि उहाँलाई नेपालको स्वास्थ्य सेवा उद्योगमा महत्वपूर्ण प्रभाव जमाउँदै अघि बढिरहनुभएकी एक सशक्त युवा महिला नेतृत्वको रूपमा चिनिन्छ । उक्त क्रियाशीलताको कदरस्वरूप उहाँले ‘बिज पुरस्कार–२०१९’ प्राप्त गर्नुभएको छ । नेपालको अग्रणी चिकित्सा संस्था ‘नर्भिक इन्टरनेशनल हस्पिटल’लाई अत्याधुनिक प्रविधियुक्त बनाएर नेपालमा स्वास्थ्यसेवाको स्तर माथि उठाउने कामको श्रेय उहाँलाई जान्छ ।

नेपालको औद्योगिक र आर्थिक क्षेत्रमा १४० वर्षभन्दा बढी समयदेखि योगदान पुर्‍याइरहेको ठूलो व्यावसायिक समूह हो बीएलसी होल्डिङ्स । उहाँको दूरदृष्टि नेतृत्वमा बीएलसी विभिन्न क्षेत्रमा फैलिएको एक सशक्त व्यावसायिक संस्था बनेको छ भने गुणस्तर, नवीनता र सामाजिक प्रभावलाई उच्च प्राथमिकता दिएको छ । मेघा चौधरीले पशुपति बिस्कुट र बीएलसी इन्स्ट्यान्ट फूड्सलाई नेपालकै प्रमुख ब्रान्डहरू बनाउन नेतृत्व गरिरहनुभएको छ । यस्तै, सीजीएनएस सिड्स र हेटौँडा डेरीजस्ता संस्थाहरूमार्फत नेपालको कृषि उत्पादन वृद्धि गर्न स्थानीय किसानलाई सहयोग पुर्‍याउँदै नवीन प्रविधिको प्रयोगबाट कृषि क्षेत्रमा दिगो विकासलाई प्रवर्द्धन गर्नुभएको छ ।

यसैगरी, लाइफस्टाइल र मनोरञ्जन क्षेत्रमा नवीनता, पूर्वाधार र प्याकेजिङ्ग उद्योगमा योगदान, अन्तर्राष्ट्रिय व्यापार विस्तार तथा सामाजिक सेवामा महत्वपूर्ण योगदान दिनुभएको छ । उहाँले बसन्त चौधरी फाउन्डेसनमार्फत, शिक्षा, स्वास्थ्य र संस्कृति जस्ता क्षेत्रहरूमा टोल–समाजलाई सहयोग पुर्‍याउँदै, परम्परा र आधुनिकताको सही सन्तुलन कायम गर्दै नेपालमा मात्र नभई अन्तर्राष्ट्रिय रूपमा पनि बीएलसीको विस्तार गर्ने योजना उहाँले बनाइरहनुभएको छ ।

हेर्नुहोस् भिडिओ–