रगत परीक्षणले ५० भन्दा बढी प्रकारका क्यान्सरको पहिचान हुन सक्ने अध्ययनको दाबी

काठमाडौं । एउटा नयाँ अध्ययनले एउटै रगत परीक्षणले ५० भन्दा बढी प्रकारका क्यान्सरहरूको पहिचान हुनसक्ने सम्भावना देखाएको छ । अमेरिका र क्यानडामा गरिएका परीक्षणहरूको नतिजाले परीक्षणले धेरै प्रकारका क्यान्सरहरू पहिचान गर्न सक्षम भएको देखाएको दाबी गरिएको छ ।

यी क्यान्सरहरूको लगभग तीन–चौथाईको लागि, कुनै स्क्रिनिङ कार्यक्रमहरू नरहेको बताइएको छ । यस परीक्षणद्वारा पत्ता लगाइएका आधा भन्दा बढी क्यान्सरहरू तिनीहरूको प्रारम्भिक चरणहरूमा पत्ता लगाइएका थिए, जसबाट तिनीहरूको उपचार गर्न सजिलो हुन्छ र पूर्ण रूपमा निको हुन सक्छ ।

यो परीक्षण अमेरिकी औषधि कम्पनी ग्रेलद्वारा विकसित गरिएको थियो । ग्रेलद्वारा विकसित ग्यालेरी परीक्षणले ट्यूमरबाट टुक्रिएका र रगतमा परिसंचरण गरिरहेका क्यान्सरयुक्त डीएनएका टुक्राहरू पत्ता लगाउन सक्ने बताइएको छ । बेलायतको राष्ट्रिय स्वास्थ्य सेवाले हाल यो परीक्षणको परीक्षण गरिरहेको जनाएको छ।

यो परीक्षण अमेरिका र क्यानडाका २५,००० वयस्कहरूलाई एक वर्षसम्म गरिएको थियो, जसमध्ये लगभग १०० मध्ये एक जनाले सकारात्मक नतिजा पाएका थिए । यी मध्ये ६२ प्रतिशत केसहरूमा पछि क्यान्सर पुष्टि भएको थियो ।

ओरेगन हेल्थ एण्ड साइन्स युनिभर्सिटीका रेडिएसन मेडिसिनका सह–प्राध्यापक, प्रमुख अनुसन्धानकर्ता डा. निमा नबाविजादेहले तथ्याङ्कले परीक्षणले क्यान्सर स्क्रिनिङको लागि उनीहरूको दृष्टिकोणमा मौलिक रूपमा परिवर्तन गर्न सक्ने बताए । उनले यसले धेरै प्रकारका क्यान्सरहरू पत्ता लगाउन मद्दत गर्ने र समयमा उपचार गर्न सकिने अवस्था आउन सक्ने बताएका छन् । परीक्षणले नकारात्मक परीक्षण गर्ने ९९ प्रतिशतभन्दा बढीमा क्यान्सरलाई सही रूपमा नरहेको पुष्टि गरेको थियो ।

यस परिक्षणले स्तन, आन्द्रा, फोक्सो र पाठेघरको स्क्रिनिङसँग जोड्दा यसले समग्रमा पत्ता लागेको क्यान्सरको संख्या सात गुणा बढाएको दाबि गरिएको छ । यसमा महत्वपूर्ण कुरा के छ भने पत्ता लागेको तीन–चौथाई क्यान्सरहरू ती थिए जसको स्क्रिनिङ कार्यक्रम नै छैन, जस्तै डिम्बग्रंथि, कलेजो, पेट, मूत्राशय र प्यान्क्रियाटिक क्यान्सर । रगत परीक्षणले १० मध्ये नौ केसहरूमा क्यान्सरको उत्पत्ति सही रूपमा पहिचान गरेको पनि बताइएको छ । यी प्रभावशाली नतिजाहरूले क्यान्सरको प्रारम्भिक निदानमा अन्तत: रक्त परीक्षणले प्रमुख भूमिका खेल्न सक्छ भन्ने संकेत दिएको छ ।

तर अनुसन्धानमा संलग्न नभएका वैज्ञानिकहरूले भने रक्त परीक्षणले क्यान्सरबाट हुने मृत्युलाई कम गर्छ कि गर्दैन भनेर देखाउन थप प्रमाण आवश्यक रहेको बताएका छन् ।

यो परिक्षणका परिणामहरू बर्लिनमा युरोपेली सोसाइटी फर मेडिकल ओन्कोलोजी कांग्रेसमा जारी गरिने र पूर्ण विवरणहरू अझै पियर–समीक्षा जर्नलमा प्रकाशित हुन बाँकी रहेको बताइएको छ । यस परिक्षणको अर्को चरण इङ्गल्याण्डमा एक लाख ४० हजार नेशनल हेल्थ सर्भिस (एनएचएस) बिरामीहरूलाई समावेश गरिएको तीन वर्षको परीक्षणको नतिजामा निर्भर गर्नेछ, जुन अर्को वर्ष प्रकाशित हुनेछ ।