सोमबार, असार १, २०८३
कर्पोरट खबर
8:15 am, सोमबार, असार १, २०८३
काठमाडौं । ब्राजिलको साओ पाउलो राज्यमा बन्जी जम्पिङ गर्ने क्रममा भएको दर्दनाक दुर्घटनामा २१ वर्षकी युवतीको ज्यान गएको छ । घटनामा सुरक्षा डोरी नलगाइ पुलबाट फालिएपछि उनी १३० फिटभन्दा धेरै गहिरो खाल्डोमा खस्दा मृत्यु भएको बताइएको छ ।
मृतकको पहिचान मारिया एडुआर्दा रोड्रिग्स दि फ्रेटासका रूपमा गरिएको छ । उनी निजी कम्पनीले आयोजना गरेको बन्जी जम्पिङ कार्यक्रममा सहभागी हुन पुगेकी थिइन् । दुर्घटना स्केलेटन पुलमा भएको हो ।
सामाजिक सञ्जालमा सार्वजनिक भएको भिडियोमा कर्मचारीहरूले उनलाई पुलको किनारासम्म लैजाने र त्यसपछि तल छोड्ने दृश्य देखिन्छ । उनी खस्न थालेपछि मात्रै त्यहाँ उपस्थित मानिसहरूले उनको शरीरमा सुरक्षा डोरी नबाँधिएको थाहा पाउँछन् ।
भिडियोमा ‘डोरी… डोरी…’ भन्दै मानिसहरू चिच्याइरहेका सुनिन्छन् तर त्यसबेला धेरै ढिलो भइसकेको थियो । युवती गहिरो खाल्डोमा खसिसकेकी थिइन् । घटनापछि प्रहरीले छ जनालाई नियन्त्रणमा लिएर अनुसन्धान सुरु गरेको छ ।
घटनाभन्दा केही समयअघि मारियाले आफ्नो सामाजिक सञ्जालमा जम्प गर्ने स्थानका तस्बिरहरू पनि राखेकी थिइन् । एक तस्बिरमा पुल र जम्पिङका लागि प्रयोग हुने रिस्टब्यान्ड देखिन्छ ।
रिपोर्ट अनुसार दुर्घटनाका बेला उनको प्रेमी पनि त्यहीँ उपस्थित थिए । घटनाको खबर पाएपछि उनको अवस्था बिग्रिएको र उपचार गरिएको जनाइएको छ ।
यस दुर्घटनापछि साहसिक पर्यटन गतिविधिको सुरक्षा व्यवस्थामाथि गम्भीर प्रश्न उठेका छन् । स्थानीय मेयरले यस घटनाबारे सरकारसमक्ष उजुरी गर्ने र दोषीमाथि कडा कारबाहीको माग गर्ने बताएका छन् । प्रहरीले अब सुरक्षा प्रक्रिया कहाँ चुक्यो, कर्मचारीको जिम्मेवारी के थियो र नियमअनुसार सबै प्रक्रिया पालना गरिएको थियो कि थिएन भन्ने विषयमा अनुसन्धान गरिरहेको छ ।
बन्जी जम्पिङ एक साहसिक खेल हो, जसमा मानिसलाई उच्च पुल वा टावरबाट बलियो लोचिलो डोरीको सहायताले हाम फाल्न लगाइन्छ । जम्प गर्नु अघि शरीरमा विशेष हार्नेस लगाइन्छ र त्यसलाई डोरीसँग जोडिन्छ । हाम फालेपछि मानिस केही क्षण तीव्र गतिमा तल झर्छ । डोरी तन्किएपछि उसलाई फेरि माथि तानिन्छ, जसले तल–माथि झुलिने रोमाञ्चक अनुभव दिन्छ । सामान्यतया यस खेलमा सुरक्षा नियम कडाइका साथ पालना गरिन्छ । व्यक्तिको तौल अनुसार डोरी छनोट गरिन्छ, हार्नेस र जोड्ने सबै प्रणाली बारम्बार जाँचिन्छ र प्रशिक्षकको अनुमति पछि मात्र जम्प गराइन्छ । विशेषज्ञका अनुसार सबै सुरक्षा नियम पालना गरेर अनुभवी निगरानीमा गरिएमा यो खेल धेरै हदसम्म सुरक्षित मानिन्छ ।
