ब्रोकर लाइसेन्स रोक्ने निर्णय खारेज गर्न न्यु स्टक ब्रोकर एशोसिएसनको माग,अर्थ समितिलाई ज्ञापन पत्र बुझायो

काठमाडौं । नयाँ ब्रोकर लाइसेन्स रोक्ने अर्थ समितिको निणर्यप्रति न्यु स्टक ब्रोकर एशोसिएसनले आपत्ति जनाएको छ । एशोसिसनले मंगलबार नै अर्थ समितिलाई ज्ञापनपत्र बुझाउदै नयाँ धितोपत्र दलाल व्यवसायी तथा व्यापारीको लाइसेन्स रोक्न नहुने माग गरेको छ ।

अर्थ समिति समक्ष एशोसिएसनले नेपालको पूँजी बजार विकास तथा विस्तारमा नेपाल सरकार, मन्त्री परिषद तथा मातहतका मन्त्रालय एवं नियामक निकाय नेपाल धितोपत्र बोर्डबाट विभिन्न चरणहरुमा आवश्यकता बमोजिमका कार्यहरु भइरहेको पनि अवगत गराएको छ ।

यस्तै एशोसिएसनले विभिन्न कानूनी तथा अन्य विभिन्न अड्चनहरुलाई टुंगो लगाउँदै सर्वोच्च अदालतबाट २०७९ चैत्र २६ गते जारी अन्तरिम आदेश उपरको फैसला भएपश्चात आवश्यक प्रक्रिया अगाडि बढाएको एशोसिएसनले जनाएको छ । सर्बोच्च अदालतको फैसला पश्चात बोर्डले विभिन्न ४३ वटा नयाँ कम्पनीहरुलाई धितोपत्र दलाल व्यवसाय तथा धितोपत्र व्यापारी सम्बन्धी कार्य अगाडि बढाउन ३ वटा चरण गरेर आशय पत्र जारी गरेको छ ।

यसै अनुरुप नयाँ धितोपत्र दलाल तथा धितोपत्र व्यापारी कम्पनीहरुले धितोपत्रव्यवसायी (धितोपत्र दलाल तथा व्यापारी) नियमावली, २०६४ ( पाँचौं संशोधन सहित) अनुरुप तोकिएकोमापदण्ड पूरा गरी नेपाल धितोपत्र बोर्डबाट पूर्वाधार निरीक्षण सम्पन्न भई दुई चरणबाट १८ वटा नयाँ धितोपत्र दलाल व्यवसायीहरुले अनुमति पाइसकेको र सो मध्येबाट ७ वटा धितोपत्र दलाल व्यवसायीहरुले नेपाल स्टक एक्सचेन्ज लि। बाट पूर्वाधार तयारी गरी जानकारी गराउने आशय पत्र समेत जारी गरेको र उपरोक्त ७ वटा नयाँ धितोपत्र दलाल व्यवसायीहरुले धितोपत्र कारोबार सञ्चालन विनियमावली, २०७९ (तेश्रो संशोधन) अनुरुप तोकिएको पूर्वाधारहरु पूरा गर्नुका साथै आवश्यक सम्पूणर् कर्मचारीहरु भर्ना गरी कार्यालय समेत सञ्चालन गर्ने व्यवस्था समेत मिलाएको एशोसिएसनले जनाएको छ ।

यस्तै अवस्थामा अविश्वसनीय ढंगबाट सर्वोच्च अदालतको फैसलालाई समेत चुनौति हुने गरी अर्थ समितिको निणर्य भएको एशोसिएसनको आरोप छ । यस्तो निर्देशनले पूँजी बजारको विस्तार र विकासमा अवरोध पुग्ने बताउदै एशोसिएसनले यस्तो पूर्वाग्रहपूर्ण निर्देशनलाई तुरुन्त खारेज गर्न अर्थ समिति समक्ष माग गरेको हो ।