सीजी मोटर्स सबैभन्दा बढी आयकर बुझाउने कम्पनीका रुपमा सम्मानीत

ललितपुर । आन्तरिक राजश्व कार्यालय ललितपुरले सीजी मोटर्स प्रा.ली लाई सबैभन्दा बढी आयकर बुझाउने कम्पनीका रुपमा सम्मान गरेको छ । राष्ट्रिय कर दिवसको अवसरमा शुक्रबार राजश्व कार्यालयमा आयोजित एक कार्यक्रमकाबीच उक्त सम्मान गरिएको हो ।

आन्तरिक राजश्व कार्यालय ललितपुरमा व्यवसायिक स्थायी लेखा नम्बर लिई कारोबार गरेका करदाताहरूमध्ये आर्थिक बर्ष २०७९/०८० को आय विवरणको आधारमा सबैभन्दा बढी आयकर दाखिला गरेकोमा सीजी मोटर्सलाई सम्मान गरिएको आन्तरिक राजश्व कार्यालयले जनाएको छ ।

आन्तरिक राश्व कार्यालयका प्रमुख कर अधिकृत नवराज पन्थीले चौधरी ग्रुपका प्रवन्ध निर्देशक निर्वाण चौधरीलाई खादा र सम्मान पत्रद्वारा सम्मान रेका हुन् । सीजी मोटर्सलाई सबैभन्दा बढी आयकर बुझाउने कम्पनीका रुपमा सम्मान गर्न पाउँदा खुसी लागेको र आगामी बर्षहरूमा कम्पनीले थप व्यवसायिक सफलता हासिल गर्न सकोस् भन्दै उनले शुभकामना दिए ।

चौधरी ग्रुपका प्रवन्ध निर्देशक चौधरीले आफ्नो ग्रुपले देशको कुल सरकारी राजश्वको दुई प्रतिशत कर योगदान गर्न सकेकोमा सन्तोष व्यक्त गर्नुहुदै राष्ट्रको भौतिक एवं सामाजिक विकासमा यस्तो योगदानलाई बढाउदै लैजान चौधरी ग्रुप प्रतिवद्ध रहेको बताए ।