भीम रावललाई राजीनामा फिर्ता लिन अध्यक्ष ओलीको आग्रह

काठमाडौँ– नेकपा एमालेका अध्यक्ष केपी शर्मा ओलीले पार्टी उपाध्यक्ष भीम रावलले सांसद पदबाट दिएको राजीनामा फिर्ता लिन आग्रह गरेका छन् ।सोमबार ललितपुरको च्यासलमा शुरू भएको केन्द्रीय कमिटी बैठकमा अध्यक्ष ओलीले रावलले हतारिएर सांसद पदबाट राजीनामा दिएको भन्दै फिर्ता लिनुपर्ने बताएका हुन् ।

अध्यक्ष ओलीले माधव नेपालले १० बुँदे सहमति पालना नगर्ने र देउवालाई विश्वासको मत नदिई नछाड्ने भएपछि रावलले राजीनामा दिएको बताए । यद्यपि त्यो आवश्यक नरहेको ओलीको भनाइ थियो ।ओलीले भने, ‘अझै पनि सकिन्छ भने राजीनामा फिर्ता लिनुहोस् ।’ एकता जोगाउन आग्रह गर्दा माधव नेपालले रावललाई हप्काएर पठाएपछि रावलले राजीनामा दिएको ओलीले बताए ।सर्वोच्च अदालतको आदेशमा दोस्रोपटक पुनर्स्थापित प्रतिनिधिसभाको आइतबार बसेको पहिलो बैठक शुरू हुनु अगावै रावलले सांसद पदबाट राजीनामा दिएका थिए ।रावल एमालेको विघटित कार्यदलको नेपाल पक्षका संयोजक पनि हुन् ।