प्रवासी नेपालीलाई अध्यक्ष ढकालको आग्रह– कमाइको केही अंश नेपालमा लगानी गर्नुस्, प्रतिफलको वातावरण हामी बनाउँछौँ

काठमाडौं । नेपाल उद्योग वाणिज्य महासंघका अध्यक्ष चन्द्रप्रसाद ढकालले नेपालमा लगानीको अपार सम्भावना रहेको बताउँदै आफ्नो आम्दानीको केही अंश नेपालमा लगानीका लागि वैदेशिक रोजगारीमा रहेका नेपाली तथा गैरआवासीय नेपालीहरूलाई आग्रह गरेका छन् ।

नेपाली जनसम्पर्क समिति यूएईद्वारा नयाँ वर्ष २०८२ को अवसरमा आयोजित शुभकामना आदानप्रदान कार्यक्रमलाई सम्बोधन गर्दै अध्यक्ष ढकालले नेपालमा लगानीका प्रशस्त सम्भावना रहेको र धेरै क्षेत्रहरू एक्सप्लोर गर्न बाँकी रहेको हुँदा ती क्षेत्रमा लगानी गरी राम्रो प्रतिफल लिन सकिने बताए ।

‘मलाई के लाग्छ भने नेपालमा धेरै सम्भावना छ । धेरै क्षेत्रहरू एक्सप्लोर गर्न बाँकी छन् । तर, नेपालमा सम्भावना छैन भन्ने र हरेक कुरा नकारात्मक रूपमा लिने गरिएको पाइन्छ । अझ विदेशमा बस्ने नेपालीहरूलाई विदेशको विकास र प्रविधिहरू देखेर नेपालसँग तुलना गर्ने र विरोध गर्ने गरेको पनि पाइन्छ । म यहाँहरूलाई भन्न चाहन्छु, यदि साँच्चिकै विदेशमा गरेको जस्तै लगानी र मिहिनेत नेपालमै गर्ने हो भने नेपालमा धेरै सम्भावना छन्,’ उनले भने ।

उनले हालै नेपाल सरकारले गरेको कानुन सुधारले लगानीकर्ताहरूमा उत्साह ल्याएको र मुलुकमा लगानीको वातावरण पनि बन्दै गएको उल्लेख गरे ।

‘हालै नेपाल सरकारले दुई दर्जन बढी कानुनहरू सुधार गरेर मुलुकमा लगानीका लागि मार्ग प्रसस्त गर्न खोजेको छ । यो निजी क्षेत्र, विशेष गरी नेपाल उद्योग वाणिज्य महासंघकै पहलमा भएको हो । म नेतृत्वमा आएदेखि नै हामीले मुलुकमा लगानीमैत्री वातावरण बनाउन र वैदेशिक लगानी भित्र्याउन विशेष पहल गरिरहेका छौँ । वैदेशिक लगानीका साथै गैरआवासीय नेपाली र वैदेशिक रोजगारमा रहेका नेपालीहरूले पनि आफ्नो केही हिस्सा नेपालका विभिन्न क्षेत्रमा लगानी गराउन सकियो भने हामीले अपेक्षा गरे जस्तो विकास सम्भव हुन्छ । मुलुकको विकास तपाईं–हामी सबै मिलेरै गर्ने हो,’ उनले भने ।

उनले मुलुकभित्र लगानी गरेर उत्पादन, रोजगारी र राजश्व वृद्धिमा सहयोग गर्न समेत गैरआवासीय नेपाली र वैदेशिक रोजगारमा रहेका नेपालीहरूलाई आग्रह गरे ।

‘तपाईंहरूले यहाँ धेरै राम्रो गर्नुभएको छ । तपाईंहरूले आफ्नो पुँजीको केही अंश मात्र भए पनि नेपालमा लगानी गरेर त्यहाँ उत्पादन, रोजगारी र राजस्व वृद्धिमा सघाउनुभयो भने पक्कै पनि हाम्रो विकासको गति तीव्र पार्न सकिन्छ । तपाईंहरू सबै केही समयपछि पक्कै पनि नेपाल नै फर्कनुहुन्छ । त्यसबेला त्यो लगानीले तपाईंहरूलाई पनि सपोर्ट गर्न सक्छ । त्यसबाट आउने प्रतिफलले तपाईंहरूको जीवन सहज बनाउन सहयोग गर्नेछ,’ उनले भने ।

उनले बागलुङदेखि आएर अहिले नेपालको निजी क्षेत्रको छाता संगठनको नेतृत्वमा पुगेको र विभिन्न कम्पनीमार्फत २५ हजार बढी व्यक्तिलाई प्रत्यक्ष रोजगारी दिन सफल भएको आफ्नै उदाहरण दिँदै मिहिनेत, लगनशीलता र इमान्दारितासाथ काम गरेमा नेपालमा धेरै सम्भावना रहेको पुनः दोहोर्‍याए ।

उनले वैदेशिक रोजगारीमा रहेका नेपालीसमेतलाई लगानीको अवसर प्रदान गर्ने गरी १० अर्ब रुपैयाँको नेपाल डेभलपमेन्ट कम्पनी स्थापना गरिएको जानकारी गराउँदै उक्त कम्पनीमा लगानी गर्न वैदेशिक रोजगारीमा रहेका नेपालीहरुलाई आग्रहसमेत गरे ।

यस कम्पनीले मुलुकभित्र तथा मुलुकबाहिर रहेका नेपालीहरूको छरिएर रहेको पुँजी संकलन गरी जलविद्युत, पर्यटन, उद्योग तथा विभिन्न सम्भावना भएका क्षेत्रहरूमा लगानी गर्न गइरहेको जानकारी गराउँदै ढकालले त्यसमा सहभागिताका लागि विभिन्न मुलुकमा वैदेशिक रोजगारीमा रहेका नेपालीहरु तथा गैर आवासीय नेपालीहरूलाई आग्रह गरे ।

उनले नेपालमा लगानीको वातावरण सुधार हुँदै गरेको उल्लेख गर्दै हालै नेपाल सरकारले गरेको कानुन सुधारले मुलुकमा लगानीको वातावरण बन्न सहयोग पुग्ने विश्वास व्यक्त गरे ।

उनले मुलुकमा सम्भावना छैन र विदेशी लगानीले मात्र विकास गर्न सकिन्छ भन्ने दुवै भाष्य चिर्न आवश्यक रहेको बताउदै १० अर्व रुपैयाँको नेपाल डेभलपमेन्ट कम्पनी स्वदेशी पुँजीमार्फत ठूलाठूला पूर्वाधार परियोजना निर्माणमा लगानी गरिने जानकारी गराए ।

‘विभिन्न विकसित मुलुकसँग तुलना गरेर मुलुकमा सम्भावना नै छैन भन्दै हिँड्ने र ठूलाठूला पूर्वाधार परियोजनाहरू विकास गर्न विदेशी लगानी नै आवश्यक पर्छ भन्ने दुवै भाष्य गलत छन् । यिनलाई चिर्न जरुरी छ । हामीले छरिएर रहेको सानोसानो पुँजी संकलन गर्दै हाम्रै पुँजीबाट पनि ठूलाठूला आयोजनामा लगानी जुटाउन सम्भव छ । हामीले स्थापना गरेको १० अर्ब रुपैयाँलाई इक्विटी मानेर ७५ देखि ८० प्रतिशत ऋण लिने हो भने ४० अर्बभन्दा बढी लगानी गर्न सकिन्छ । जसबाट धेरै ठूला परियोजनामा पनि लगानी जुटाउन सम्भव छ,’ उनले भने ।

कार्यक्रममा स्वास्थ्य तथा जनसंख्यामन्त्री प्रदीप पौडेल, यूएईका लागि नेपाली राजदूत तेजबहादुर क्षेत्रीलगायत विभिन्न वक्ताहरूले सम्बोधन गरेका थिए ।