चाेलेन्द्रले भने, ‘सरकारले निवासअगाडि सुरक्षाकर्मी तैनाथ गरेको छ, कसरी सर्वोच्च पुग्नु ?’

काठमाडाैं । सर्वोच्च अदालत फर्कने आफ्नो प्रयासमा सरकारले बाधा पारेपछि निलम्बित प्रधानन्यायाधीश चोलेन्द्रशमशेर जबरा आक्रोशित बनेका छन् ।

निवासमै रहेको वा निस्किएको भन्नेबारे प्रतिक्रिया लिन खोज्दा पत्रिकासँग उनले भने, ‘सरकारले बिहानैदेखि निवासअगाडि सुरक्षाकर्मी तैनाथ गरेको छ । बाहिर निस्कन दिएका छैनन् । अनि, कसरी सर्वोच्च पुग्नु ?’

उनी बसिरहेको बालुवाटारस्थित प्रधानन्यायाधीशको सरकारीनिवासअगाडि अहिले पनि सुरक्षाकर्मीको बाक्लो उपस्थिति छ । उनीहरू बिहानैदेखि त्यहाँ खटिएका हुन् ।

उनले आफू सर्वोच्च जाने तयारीमा रहे पनि सरकारले निवासमै रोकिदिएको बताए । ‘म सर्वोच्च अदालत जाने तयारी गरिरहेको थिएँ । तर, सरकारले निवासमै रोकिदियो । निवासबाहिर प्रहरी तैनाथ गरिएको छ,’ उनले भने ।

उनलाई रोक्न नेपाल बार र सर्वोच्च बारका कानुन व्यवसायीहरू पनि सर्वोच्च परिसरमा तयारी अवस्थामा छन् । सर्वोच्च गेटमै पनि व्यापक रूपमा सुरक्षाकर्मी तैनाथ गरिएको छ ।