सेती प्रादेशिक अस्पतालमा सिटिस्क्यान सेवा सञ्चालन हुँदै

काठमाडौँ । सेती प्रदेशीक अस्पतालमा सिटिस्क्यान सेवा सञ्चालनमा आउने भएको छ ।

 सेवाका लागि अस्पतालमा सिटिस्क्यान मेसिन जडान गरेर परीक्षणको अवस्थामा रहेको अस्पताल व्यवस्थापन समितिका सदस्य डिल्लीराज भट्टले बताए ।

प्रदेश सरकारको विनियोजन बजेटबाट अस्पतालमा मेसिन जडान गरेर सेवा सञ्चालन भइरहेको उनले बताए ।

मेसिन नहुँदा सुदूरपश्चिमका गम्भीर प्रकृतिका बिरामीले सिटिस्क्यान सेवा लिन सुदूरपश्चिम बाहिर वा भारत जानुपर्ने अवस्था रहेको थियो । कि महँगो शुल्क तिरेर निजी अस्पतालहरूमा जानुपर्थ्यो । तर, सेवा सुरु हुने भएसँगै सर्वसाधारणको उक्त समस्या हट्ने भएको छ, भट्टले भने ।

गरिब, असहाय र विपन्न वर्गका बिरामीले अन्यत्र महँगो शुल्कमा सिटिस्क्यान गराउन नसक्दा उनीहरू उपचारबाट वञ्चित हुनुपर्ने अवस्था रहेकोमा त्यसलाई मध्यनजर गर्दै सेवा सञ्चालनको तयारी गरिएको उनले बताए । 

मस्तिष्कघात लगायत मस्तिष्क भित्रका अन्य चोट, नशामा रगत जमेको, घाँटीको समस्या, हड्डीको समस्या, पेटको समस्या लगायत सबै प्रकारका जटिल रोगको निदानमा सिटिस्क्यान मेसिन उपयोगी हुने अस्पताल प्रशासनले जनाएको छ ।