नाइमाद्वारा ‘सीकेडी भेहिकल एसेम्बली’ विषयक ९औँ मोबिलिटी संवाद सम्पन्न

काठमाडौँ नेपाल अटोमोबिल इम्पोर्टर्स एन्ड म्यानुफ्याक्चरर्स एसोसिएसन (नाइमा) ले इन्स्टिच्युट अफ इन्जिनियरिङ(आइओई), थापाथली क्याम्पससँगको सहकार्यमा आफ्नो मासिक ‘मोबिलिटी संवाद’को नवौँ श्रृङ्खला सम्पन्न गरेको छ ।

क्याम्पस प्रमुख डा. खेम ज्ञवालीको अध्यक्षतामा सम्पन्न उक्त कार्यक्रमको मुख्य विषय ‘कम्प्लिटली नक्ड डाउन भेहिकल एसेम्बली: अवसर, चुनौती र अगाडिको बाटो’रहेको थियो।

कार्यक्रममा बोल्दै क्याम्पस प्रमुख डा. ज्ञवालीले लामो समयपछि उद्योग र शैक्षिक क्षेत्रबीचको सहकार्यमा यस्तो महत्वपूर्ण कार्यक्रम आयोजना गर्न पाएकोमा खुसी व्यक्त गरे ।उनले यस्ता संवादहरू व्यवहारिक सिकाइ, अनुसन्धान र उद्योगसँगको सहकार्य विस्तारका लागि अपरिहार्य रहेको उल्लेख गर्दै आयोजक नाइमा र अटोमोबिल एन्ड मेकानिकल इन्जिनियरिङ स्टुडेन्ट्स इनोभेटिभ नेक्सस(आमेसिन) लाई धन्यवाद दिए ।

करिब २०० जनाको सहभागिता रहेको उक्त कार्यक्रममा प्राविधिक प्रस्तुति र प्यानल छलफल समेत आयोजना गरिएको थियो। प्यानल छलफलमा यातायात व्यवस्था विभागका प्राविधिक निर्देशक श्रीकान्त यादव, उद्योगपति तथा नाइमाका बोर्ड सदस्य शेखर गोल्छा र थापाथली क्याम्पसका सहायक प्राध्यापक इ. लक्ष्मण पालिखेल सहभागी थिए । छलफलका क्रममा वक्ताहरूले दक्ष जनशक्ति विकास, प्रविधि स्थानान्तरण र नीतिगत स्थायित्वबिना दिगो औद्योगिक विकास सम्भव नहुनेमा जोड दिए ।

कार्यक्रममा नाइमाका सदस्य एवं सारडा ग्रुपका निर्देशक गौरव सारडाले ‘सीकेडी भेहिकल एसेम्बली’लाई ‘मेक इन नेपाल’ नीतिसँग जोडिएको व्यवहारिक औद्योगिक मोडेलको रूपमा प्रस्तुत गरे ।

उनले यसले युवा रोजगारी सिर्जना र स्थानीय आपूर्ति श्रृङ्खलाको विकासमा महत्वपूर्ण भूमिका खेल्ने बताए । नाइमाका कार्यकारी निर्देशक राजकुमार दुलालले आगामी दिनमा यस्ता संवादलाई निरन्तरता दिँदै १०औँ श्रृङ्खला पुल्चोक क्याम्पसमा आयोजना गर्ने योजना रहेको जानकारी दिए ।