कांग्रेस महाधिवेशन : काठमाडौं–५ को क्षेत्रीय सभापतिमा खड्काको उम्मेदवारी घोषणा

काठमाडौं । नेपाली कांग्रेसको १४औं महाधिवेशन नजिकिँदै जाँदा सबै तहका नेतृत्वमा आकांक्षा राख्ने नेताहरूले आ–आफ्नो दाबी प्रस्तुत गर्ने क्रम शुरू भएको छ । सोही अनुसार कांग्रेस महासमिति सदस्य श्याम खड्काले आगामी अधिवेशनका लागि क्षेत्रीय सभापतिमा उम्मेदवारी घोषणा गरेका छन् ।

पार्टी केन्द्रले क्रियाशील सदस्यता टुंगाएर अधिवेशनको औपचारिक प्रक्रिया आरम्भ गर्न लागेसँगै उनले १३औं महाधिवेशनअन्तर्गत निर्वाचित इकाई सभापतिहरूको भेला बोलाएर खड्काले उम्मेदवारी घोषणा गरेका हुन् । उम्मेदवारी घोषणा कार्यक्रममा खड्काले आफ्नो उम्मेदवारी तीनै तहको निर्वाचनमा पार्टीलाई विजयी गराउने गरी संगठन निर्माण गर्न भएको दाबी गरेका छन् ।

उक्त क्षेत्रमा संघ, प्रदेश र स्थानीय तहमा कांग्रेस पराजित भएकाले पार्टी पुरानो विरासत फर्काउने आफ्नो मुख्य लक्ष्य रहेको खड्काको भनाइ छ । क्षेत्रीय सभापतिमा उनीसहित अन्य आकांक्षीहरूले समेत उम्मेदवारी दिने तयारी गरेका छन् ।

लगातार दुई पटक क्षेत्रीय सभापति रहेका रमेश खड्का तेस्रो कार्यकालका लागि उम्मेदवार बन्ने तयारीमा छन् । तर, उनले औपचारिक घोषणा गरिसकेका छैनन् । उनी प्रदेश सांसदमा पराजित उम्मेदवार हुन् ।

त्यस्तै क्षेत्रीय कार्यसमितिका सचिव जनकराज श्रेष्ठ पनि सभापतिका आकांक्षी देखिएका छन् । लगातार दुई कार्यकाल सचिव रहेका श्रेष्ठ बसुन्धारामा सम्पर्क कार्यालय खोले पनि उम्मेदवारीका औपचारिक घोषणा भने गरिसकेका छैनन् ।

त्यसैगरी पार्टी महाधिवेशन प्रतिनिधि मनिष जोशीले पनि क्षेत्रीय सभापतिमा आकांक्षा प्रकट गरेका छन् । गएको निर्वाचनमा प्रदेशसभामा पार्टीको तर्फबाट समानुपातिक उम्मेदवार रहेका जोशीले पनि औपचारिक घोषणा भने गरिसकेको छैनन् ।

कांग्रेसकै युवा नेता राजेश अधिकारीले पनि सो पदका लागि उम्मेदवारी दिने बताएका छन् । सामाजिक सञ्जाल र सञ्चार माध्यमबाट अधिकारीले क्षेत्रीय नेतृत्व लिन चाहेको बताउँदै आएका छन् । उनी काठमाडौं महानगरपालिका–३ का इकाई पूर्वसभापति समेत हुन् ।