कांग्रेस महाधिवेशनः पार्टीलाई सुदृढ बनाएर अघि बढाउने अवसर

काठमाडौँ । अन्योल र अनिश्चयबीच नेपाली कांग्रेसको १४औं महाधिवेशन शुक्रबार काठमाडौंमा सुरु भएको छ। उत्साह,एकता,रूपान्तरण भन्ने मूल नारासहित भृकुटीमण्डपमा कांग्रेस सभापति शेरबहादुर देउवाले महाधिवेशन उद्घाटन गरे।

उद्घाटन सत्रमा कांग्रेसका शीर्ष नेताहरूले संघीय लोकतान्त्रिक गणतन्त्रसहितको संविधानको रक्षा गर्दै समाज परिवर्तनका लागि पार्टीलाई अझ सबल र सक्षम बनाएर अघि बढ्नुपर्ने र त्यसका लागि नेता कार्यकर्ताबीच एकता हुनुपर्नेमा जोड दिए।

मुलुकमा कांग्रेस कमजोर हुँदा परिवर्तन नै संकटमा पर्ने गरेको प्रसंग कोट्याउँदै कांग्रेसका शीर्ष नेताहरूले लोकतान्त्रिक गणतन्त्रसहितको अहिलेको शासन व्यवस्थालाई सार्थक बनाउन अब हुने तीन तहको निर्वाचन कांग्रेसले जित्नैपर्ने बताए।

देउवाले कांग्रेसले केपी शर्मा ओली नेतृत्वको सरकारको डरत्रासबाट जनतालाई मुक्ति दिएको भन्दै अब त्यस्तो अवस्था आउन नदिन नेता कार्यकर्ता सचेत हुनुपर्ने बताए। फेरि सभापतिको प्रत्यासी बन्ने तयारीमा रहेका देउवाले पार्टीलाई सुदृढ बनाएर अघि बढाउन आफू तयार रहेको दाबी गरे। ‘साथीहरू तपाईंहरूलाई थाहै छ,हाम्रो देशभर कस्तो अवस्था थियो,सारा साथीहरू डराउनुपर्ने अवस्था थियो। डरत्रासको अवस्था थियो,’ देउवाले भने, ‘म प्रधानमन्त्री भएको भोलिपल्ट नै सबै मान्छेले मुक्ति पाएको महसुस गरे।’

प्रधानमन्त्रीसमेत रहेका देउवाले अब देशमा डरत्रासको अवस्था आउन नदिन र कांग्रेसलाई आगामी निर्वाचनमा जिताउनका लागि फेरि आफूलाई सभापति बनाउन महाधिवेशन प्रतिनिधिलाई आग्रह गरे। ‘कांग्रेसलाई एकताबद्ध र बलियो बनाउन यो महाधिवेशनले थप आधार तयार गर्छ,गर्नुपर्छ। यो महाधिवेशनले जनतालाई डरत्रासबाट मुक्त गर्ने कि नगर्ने भन्ने पनि निर्धारण गर्नुपर्छ,’ देउवाले भने, ‘त्यो निर्णय गरेको खण्डमा अब गाउँदेखि केन्द्रसम्मै कांग्रेसको सरकार हुन्छ, त्यो मेरो जिम्मा भयो।’

महाधिवेशन प्रतिनिधि कतै सहमति त कतै प्रतिस्पर्धाबाट छानिएर आएको उल्लेख गर्दै देउवाले अब मनोमालिन्यबाट मुक्त हुनुपर्ने बताए। आन्तरिक निर्वाचनका कारण आगामी निर्वाचनमा त्यसको असर पर्न नहुने भन्दै देउवाले पार्टीलाई एकताबद्ध बनाएर अघि बढाउन आफू प्रतिबद्ध रहेको दोहोर्‍याए।

कार्यक्रममा कांग्रेस नेता रामचन्द्र पौडेलले महाधिवेशनले पार्टीलाई सबल, सक्षम र एकताबद्ध बनाउनुपर्ने बताए। आफूले अपमान सहेर पनि पार्टी एकता कायम राखेको बताउँदै पौडेलले कार्यकर्ताको मात्र नभएर नेताको पनि मूल्यांकन गर्न आग्रह गरे। ‘कार्यकर्ताले नेतृत्वको मूल्यांकन गर्ने हैसियत राख्नुपर्छ।

जब कार्यकर्तासँग त्यो क्षमता हुन्छ,तबमात्रै हामी अघि बढ्न सक्छौं,’ पौडेलले भने, ‘अहिले हाम्रो पार्टीको गति रोकिएको छ, पार्टीलाई यो अवस्थाबाट अगाडि बढाउनका लागि यो महाधिवेशन एउटा अवसर हो। परिवर्तन आजको आवश्यकता हो। परिवर्तित भएर काम गरौं।’

पार्टीभित्र आन्तरिक लोकतन्त्र, विधि, पद्धति र समयबद्ध काम गर्ने परिपाटी अन्त्य भएको बताउँदै पौडेलले आन्तरिक लोकतन्त्र मजबुत नभएसम्म प्रतिपक्षी दलसँगको प्रतिस्पर्धा कठिन रहेको औंल्याए। ‘हामीले अहिले नीति तथा कार्यक्रमका बारेमा गम्भीर छलफल गर्नुपर्ने थियो तर हामीले व्यवस्थित रूपमा महाधिवेशन गर्न सकेनौं, बेलामा हुन सकेन,’ पौडेलले भने, ‘जसले गर्दा हडबडमा महाधिवेशन सम्पन्न गर्नुपरेको छ, विधि पुर्‍याउने कुरामा मात्रै सीमित हुन पुगेका छौं।

यसले पार्टीलाई नयाँ रक्तसञ्चार गर्न सक्दैन।’ एक वर्षभित्र हुने तीन तहको निर्वाचनमा विरोधी शक्तिहरूसँग प्रतिस्पर्धा गर्नुपर्ने स्थिति रहेको औंल्याउँदै पौडेलले भने, ‘नेपालको राजनीतिमा हामीले धेरै विरोधीहरूसँग प्रतिस्पर्धा गर्नुपर्नेछ,त्यो निकै कठिन छ, त्यो ज्यादै उकालो छ,विरोधीसँग जुध्न सक्ने नेतृत्व चयन अहिलेको आवश्यकता हो।’

लोकतन्त्रको विकल्प उन्नत लोकतन्त्र मात्र हुने भए पनि यसअघिको निर्वाचनमा कांग्रेस किन पराजित भयो भन्ने प्रश्न गर्दै पौडेलले त्यसको कारण खोज्न पनि नेता कार्यकर्तालाई आग्रह गरे। उनले पहुँच र पार्टीमा लागेका आधारमा नभएर सामान्य जनताले न्याय पाउने अवस्था बनाउन कांग्रेस लाग्नुपर्ने बताएको आजको नागरिक दैनिकमा समाचार छ ।