एफएनसीसीआईका कोषाध्यक्ष आचार्यलाई ‘कर्पोरेट बिजनेश लिडरशिप अवार्ड’ (भिडिओ)

काठमाडौं । नेपाल उद्योग वाणिज्य महासंघ (एफएनसीसीआई) का कोषाध्यक्ष भरत राज आचार्यले ‘कर्पोरेट बिजनेश लिडरशिप अवार्ड’ प्राप्त गर्नुभएको छ ।

कर्पोरेट म्यागजिनले उहाँलाई सो अवार्ड प्रदान गरेको हो । बिहीबार र्‍याडिसन होटेलमा आयोजित १७औँ संस्करणको ‘कर्पोरेट बिजनेश अवार्ड’ समारोहमा उहाँलाई ‘कर्पोरेट बिजनेश लिडरशिप अवार्ड’ प्रदान गरिएको कर्पोरेट म्यागजिनका संस्थापक सम्पादक उज्वलजंग शाहले जानकारी दिनुभयो ।

विभिन्न उद्योग तथा व्यवसायमा आवद्ध रहनुभएका उहाँले उद्योग–व्यवसाय सम्बद्ध संघसंस्थाहरूको कुशलतापूर्वक नेतृत्व गर्नुभएकाले उहाँले सो अवार्ड पाउनुभएको हो ।

भरतराज आचार्यबारे–

सन् १९८१ मा बुबा रामप्रसाद आचार्य र आमा भागीरथी आचार्यको ज्येष्ठ सुपुत्रको रुपमा प्यूठानमा जन्मिनुभएका युवा उद्यमी भरतराज आचार्य नेपालको निजी क्षेत्रको सङ्घीय प्रतिनिधिमूलक संस्था नेपाल उद्योग वाणिज्य महासंघ (एफएनसीसीआई) को कोषाध्यक्ष हुनुहुन्छ । यसअघि उहाँले महासंघको रोजगारदाता परिषद र उद्योग समितिको सह–सभापति हुँदै सभापति र स्थाई समिति सदस्यको रुपमा कुशल नेतृत्व प्रदान गरिसक्नुभएको छ ।

मुख्यतः उत्पादनशील औद्योगिक प्रतिष्ठानमा एक सफल एवम् चर्चित उद्योगीको पहिचान बनाउनुभएका उहाँ औद्योगिक व्यावसायिक विषयमा गहिरो अध्ययन एवम् नितीगत पहल कदमीमा प्रष्ट दृष्टिकोण प्रदान गर्न सक्नुहुन्छ । उहाँले निजी क्षेत्रको प्रतिनिधित्व गर्दै विभिन्न सरकारी फोरममा समेत नेतृत्वदायी योगदान पुर्‍याइसक्नुभएको छ ।

पहिलो पुस्ताका व्यवसायी आचार्यको सक्रियतामा स्थापित टीएसएन बिजनेश ग्रुपअन्तर्गत प्याकेजिङ प्लाष्टिक हेल्थकेयर, प्रविधि, शिक्षालगायतका अग्रणी औद्योगिक एवम् व्यावसायिक प्रतिष्ठानहरू सञ्चालनमा छन् । निजी व्यवसायबाहेक व्यावसायिक संघसंस्थामा समेत उहाँले महत्वपूर्ण योगदान र नेतृत्व प्रदान गर्दै आउनुभएको छ ।

उहाँ नेपाल प्याकेजिङ उद्योग संघ एवम् पीईटी प्रोडक्टस एण्ड क्लोजर उत्पादक संघको संस्थापक अध्यक्ष, इन्टरनेशनल प्लाष्टिक इण्डष्ट्रीज एसोसिएशन डिरेस्टको सदस्य तथा प्लाष्ट नेपाल फाउण्डेशनको सदस्यसमेत रहनुभएको छ । त्यस्तै, नेपाल इटाली–चेम्बर अफ कमर्सको कोषाध्यक्ष एवम् नेपाल–ब्राजिल चेम्बर अफ कमर्सको सदस्यको रुपमा पनि उहाँले आफ्नो नेतृत्व कौशल प्रदर्शन गरिसक्नुभएको छ ।