लाइफटाइम अचिभमेन्ट अवार्ड पाएपछि रविभक्त : विदेशी लगानी ल्याउन निजी क्षेत्रको कुरा सुन्नुपर्छ (भिडिओ)

काठमाडौं । प्रतिष्ठित उद्योगपछि रविभक्त श्रेष्ठले मुलुकमा वैदेशिक लगानी भित्र्याउन सरकारले नेपालको निजी क्षेत्रको कुराहरू सुन्नुपर्ने बताउनुभएको छ ।

कर्पोरेट मिडियाले बिहीबार होटेल र्‍याडिसनमा आयोजना गरेको ‘कर्पोरेट बिजनेश अवार्ड’ समारोहमा ‘लाइफटाइम अचिभमेन्ट अवार्ड’ ग्रहण गर्नुभएपछि सङ्क्षिप्त मन्तव्य व्यक्त गर्नुहुँदै उहाँले नेपालमा वैदेशिक लगानी भित्र्याउनका लागि निजी क्षेत्रले दिएको सुझाव कार्यान्वयन गरी उपयुक्त वातावरण निर्माण गर्नुपर्ने बताउनुभएको हो ।

‘नेपालमा अवसरहरू धेरै छन्, धेरै गर्न सकिन्छ । वैदेशिक लगानी पनि धेरै ल्याउन सकिन्छ,’ उहाँले भन्नुभयो, ‘वैदेशिक लगानी भित्र्याउन उपयुक्त वातावरण चाहिन्छ । त्यसका लागि निजी क्षेत्रले विभिन्न समयमा विभिन्न मन्त्री र मन्त्रालयहरूमा थुप्रै सुझावहरू दिएको छ, तर ती सबै कार्यान्वयन भएको मैले पाएको छैन ।’ विदेशी लगानी भित्र्याउन नेपालका निजी क्षेत्र र विदेशी लगानीकर्ताले राखेको ‘कन्सर्न’मा सरकार संवेदनशील बन्नुपर्ने धारणा उहाँको छ ।

‘म आफू एउटा मल्टिनेशनल कम्पनीसँग पनि को–अर्डिनेशनमा रहेको हुँदा धेरै कुरा थाहा छ, उहाँहरू पनि नेपालमा धेरै सम्भावनाहरू देखिरहनुभएको छ । उहाँहरूका पनि सुझाव र कन्सर्नहरूलाई सरकारले गम्भीरतापूर्वक लिएर सम्बोधन गर्‍यो भने धेरै विदेशी लगानीकर्ता आउन सक्छन्,’ उद्योगपति श्रेष्ठले भन्नुभयो, ‘यहाँ भइरहेका मल्टिनेशनल कम्पनीको क्षमता बढाएर थप लगानी ल्याउन समेत तयार छन् । त्यसकारण निजी क्षेत्रले दिएको सुझाव कार्यान्वयन गर्न म सरकारलाई आग्रह गर्दछु ।’

कार्यक्रममा प्रमुख अतिथि रहनुभएका रक्षामन्त्री मानवीर राइले उद्योगपछि श्रेष्ठले उठाउनुभएको विषयलाई आफूले सम्बन्धित मन्त्री, मन्त्रालय र क्याविनेटमा पनि छलफल गराउने प्रतिबद्धता व्यक्त गर्नुभएको छ ।

आईजे ग्रुपका अध्यक्ष समेत रहनुभए उद्योगपति श्रेष्ठले आफूलाई लाइफटाइम अचिभमेन्ट अवार्ड प्रदान गर्ने कर्पोरेट मिडिया र छनोट गर्ने छनोट समितिलाई धन्यवाद ज्ञापन गर्नुभयो भने विभिन्न अवार्ड प्राप्त गर्नुहुने सबै उद्योगी–व्यवसायीहरूलाई बधाई तथा शुभकामना व्यक्त गर्नुभयो ।

कर्पोरेट मिडिया ग्रुपले बिहीबार १७औँ संस्करणको ‘कर्पोरेट बिजनेश अवार्ड, २०२५’ भव्य रूपमा सम्पन्न गरेको छ । यो संस्करणमा ११ वटा विधामा २४ वटा अवार्ड र एक जनालाई लाइफटाइम अचिभमेन्ट अवार्ड प्रदान गरेको थियो ।

हेर्नुहोस् भिडिओ–