हाम्रो शब्दकोशमा ‘उद्योगी–व्यवसायी’ भनेका राष्ट्रसेवक हुन् : अध्यक्ष उज्वलजंग शाह (भिडिओ)

काठमाडौं । कर्पोरेट मिडियाका अध्यक्ष उज्वलजंग शाहले आफूहरूको शब्दकोषमा उद्योगी व्यवसायी भनेका राष्ट्रसेवक भएको बताउनुभएको छ ।

कर्पोरेट मिडियाको हिजो बिहीबार होटेल र्‍याडिसनमा आयोजित १७औँ संस्करणको ‘कर्पोरेट बिजनेश अवार्ड’ समारोहमा स्वागत मन्तव्य व्यक्त गर्नुहुँदै उहाँले उद्योगी–व्यवसायीहरूकै मेहनतले देश अघि बढिरहेको बताउनुभएको हो ।

‘हाम्रो शब्दकोशमा ‘उद्योगी–व्यवसायी’ भनेका राष्ट्रसेवक हुन् । तपाईंहरूको मेहनतले नै राष्ट्र अगाडि बढेको छ, हामी (नेपाली) अगाडि बढेका छौँ । त्यसैले, सबै राष्ट्रसेवकहरूलाई मेरो सलाम छ !,’ कर्पोरेट म्यागजिन र कर्पोरेट खबर अनलाइनका संस्थापक सम्पादकसमेत रहनुभएका शाहले आफ्नो मन्तव्यका क्रममा भन्नुभयो, ‘उद्योग व्यवसायका लागि राज्यले अझै पनि उपयुक्त वातावरण निर्माण गर्न सकेको छैन, तर पनि तपाइँहरू आफ्नो काममा अहोरात्र लागेर देशलाई योगदान पुर्‍याइरहनुभएको छ । कर्पोरेट बिजनेश अवार्डले तपाइँ राष्ट्रसेवकहरूमा थोरै भए पनि ऊर्जा थप्ने हाम्रो विश्वास छ ।’

कर्पोरेट म्यागजिनले १६ वर्ष पूरा गरी १७औँ वर्षमा प्रवेश गर्दा कर्पोरेट बिजनेश अवार्डको श्रृङ्खला पनि १७औँमा पुगेको बताउनुहुँदै उहाँले यी सबै उपलब्धिहरू कोही एकपक्षको मात्र नभइ सबैको साझा भएको चर्चा गर्नुभयो ।

हेर्नुहोस् भिडिओ–

‘१७ वर्षअघि, हामीले पत्रकारिताको क्षेत्रमा नयाँ आयाम थप्यौँ—त्यस्तो पत्रकारिता, जसले निजी क्षेत्रका विषयमा कलम चलाउँदै आएको छ । यसले व्यावसायिक प्रोफाइलहरू निर्माण गर्ने, उद्यमीहरूको सफलतालाई उजागर गर्ने र युवा वर्गमा ‘आफ्नै देशमै केही गरौँ’ भन्ने जोश–जाँगर बढाउने हाम्रो मुख्य उद्देश्य हो । र हामीले यसमा सफलता प्राप्त गरेको अनुभूति गरेका छौँ,’ उहाँले भन्नुभयो, ‘हिजो हामी एक्लै थियौँ, आज हाम्रो प्रतिबिम्बका रूपमा अन्य आर्थिक पत्रपत्रिका तथा अनलाइन मिडियाहरू पनि विकसित भएका छन् । हामी हाम्रो काममा कटिबद्ध छौँ ।’

आफूहरूले कर्पोरेट बिजनेश अवार्डको श्रृङ्खला २०७२ सालको महाभूकम्प तथा विश्वव्यापी कोरोना महामारीको कठिन परिस्थितिमा पनि जारी राखेको स्मरण गर्नुहुँदै उहाँले नेपालको उद्योग व्यवसाय क्षेत्रको प्रवर्द्धनका लागि सक्दो योगदान दिइरहेकै र त्यसको मूल्याङ्कन गर्ने जिम्मा इतिहासलाई छोडेको बताउनुभयो ।

उहाँले कार्यक्रमलाई भव्य र सभ्य बनाउनका लागि महत्वपूर्ण समय उपलब्ध गराउनुहुने रक्षामन्त्री मानवीर राई, कृषि तथा पशुपक्षी विकासमन्त्री रामनाथ अधिकारीलगायत उद्योगी–व्यवसायी, बैंक तथा वित्तीय क्षेत्रमा प्रतिनिधिहरू, आफ्ना कार्यालयका पत्रकार, कर्मचारीलगायत सबैलाई धन्यवाद ज्ञापन गर्नुभयो ।

कर्पोरेट मिडिया ग्रुपले बिहीबार १७औँ संस्करणमा ११ वटा विधामा २४ वटा अवार्ड र एक जनालाई लाइफटाइम अचिभमेन्ट अवार्ड प्रदान गरेको छ ।

यी समाचारहरू पनि पढ्नुहोस्–

आईजे ग्रुपका अध्यक्ष श्रेष्ठले पाउनुभयो ‘कर्पोरेट लाइफटाइम एचिभमेन्ट अवार्ड’, को हुनुहुन्छ उहाँ ?

लाइफटाइम अचिभमेन्ट अवार्ड पाएपछि रविभक्त : विदेशी लगानी ल्याउन निजी क्षेत्रको कुरा सुन्नुपर्छ (भिडिओ)

तीनकुने घटनाले देशको बेइज्जत गर्‍यो, उद्योगी–व्यवसायी आतंकित बने : रक्षामन्त्री राई (भिडिओसहित)

एक्लैले केही गर्न नसक्ने भन्दै कृषिमन्त्री अधिकारीले खोज्नुभयो निजी क्षेत्रको साथ (भिडिओ)

कर्पोरेट बिजनेश अवार्डबाट उद्योगी–व्यवसायीहरू सम्मानित, कुन सम्मान कसले पाउनुभयो ?