तीनकुने घटनाले देशको बेइज्जत गर्‍यो, उद्योगी–व्यवसायी आतंकित बने : रक्षामन्त्री राई (भिडिओसहित)

कुनै पनि सरकारी कार्यालय वा मन्त्रालयममा आएका फाइलहरूमाथिको कारबाही ढिलोमा एक हप्ताभित्र सक्ने नीति सरकारले लिएको जानकारी दिनुभएको छ

काठमाडौं । रक्षामन्त्री मानवीर राईले चैत १५ गते तीनकुने क्षेत्रमा राजावादीहरूको प्रदर्शनका नाममा भएका घटनाहरूले मुलुकको बेइज्जत गरेको बताउनुभएको छ ।

भाटभटेनी सुपर मार्केटलगायत अन्य व्यापार–व्यवसाय, उद्योगहरूमा भएको आगजनी, लुटपाट तथा तोडफोडको घटनाले देशकै बेइज्जत गर्नाको साथै मुलुकका उद्योगी–व्यवसायीहरूमा आतङ्कसमेत सृजना गरेको उहाँको भनाइ छ ।

‘आज उद्योगी व्यवसायीहरू तीनकुनेमा भएको घटनाले अफ्ठेरो महसुस गरिराख्नुभएको होला । यस्तो आततायी घटनाहरू नेपालको राजनीतिक इतिहासमा थुप्रै भएका छन् । एउटा सुपर मार्केटमा, भाटभटेनीलगायत अन्य व्यवसायहरूमा, मिडियाहरूमाथि, व्यवसायीहरूमाथि देशको बेइज्जत हुने गरी आक्रमण भयो,’ कर्पोरेट मिडियाले बिहीबार राजधानीमा आयोजना गरेको ‘कर्पोरेट बिजनेश अवार्ड, २०२५’ समारोहलाई सम्बोधन गर्नुहुँदै उहाँले भन्नुभयो, ‘यसप्रति दुःख व्यक्त गर्दै उद्योग व्यवसायहरूमा लगानी गर्नेहरूलाई सरकारले यस्ता घटनाहरूलाई नियन्त्रण गरेर अगाडि बढ्ने विश्वास दिलाउन चाहन्छु । दोषीलाई कानुनी कठघरामा उभ्यार तपाईंहरूलाई सुरक्षा दिने कुरामा सरकार लागिपर्ने छ ।’

सो अवसरमा उहाँले कुनै पनि सरकारी कार्यालय वा मन्त्रालयममा आएका फाइलहरूमाथिको कारबाही ढिलोमा एक हप्ताभित्र सक्ने नीति सरकारले लिएको जानकारी दिनुभएको छ । काम हुने फाइल भए काम गरेर पठाउने र हुने भएमा पनि नहुने सूचना दिने परिपाटीको विकास गर्नेगरी सरकार अघि बढिरहेको उहाँको भनाइ छ ।

‘कुनै पनि सरकारी कार्यालय वा मन्त्रालयमा आएका फाइलहरूमाथि अब हामी बढीमा सात दिनभित्र काम गरिसक्छौँ । यदि काम नहुने फाइल छ भने पनि ‘नहुने जानकारी’ सम्बन्धितलाई दिने परिपार्टीको विकास गर्न सरकार अघि बढिसकेको छ,’ मन्त्री राईले भन्नुभयो, ‘यसभित्र परिमार्जित भएर जाने कुरा कठिन छ । तर पनि यो कठिनाइलाई पार गरेर अहिलेको सरकार अगाडि बढ्ने कोसिस गरिरहेको छ । यहाँहरूले यसमा साथ र सहयोग सधैं दिइराख्नुभएको छ । सुझाव दिनुहोला ।’ उहाँले कार्यक्रममा उद्योगी–व्यवसायीहरूले उठाउनुभएका समस्याहरूलाई सम्बन्धित मन्त्री, मन्त्रालय र क्याबिनेटमा समेत पुर्‍याउने प्रतिबद्धता व्यक्त गर्नुभयो ।

यस्तै, उहाँले हिजोका कठिन परिस्थितिहरूलाई झेल्दै मुलुकलाई आजको अवस्थासम्म ल्याइपुर्‍याउन सहयोग गरेकामा निजी क्षेत्रलाई धन्यवाद प्रकट गर्नुभयो । ‘नेपाल गरिबी, विभिन्न राजनीतिक उतारचढाव, विभिन्न सङ्कटकालहरूलगायत थुप्रै समस्याहरूका बीचमा धेरै दुःखकष्ट झेलेर नेपालीहरूको सेवा गर्दै यहाँसम्म आउनुभएको छ । यसमा म तपाईंहरूलाई सरकारको तर्फबाट धेरैधेरै धन्वयाद व्यक्त गर्दछु,’ मन्त्री राइले भन्नुभयो ।

उहाँले निजी क्षेत्रले बारम्बार उठाउँदै आएको विभिन्न समस्याहरूमो समाधान दिने उद्देश्यका साथ सरकारले अध्यादेश ल्याएको स्पष्ट गर्नुभयो । अध्यादेशले धेरै कुरामा हसजीकरण गर्ने चर्चा गर्नुहुँदै उहाँले भन्नुभयो, ‘तपाईंहरूको माग र तपाईंहरूले बारम्बार सजग गराइरहनुभएकैले हामीले केही समयअगाडि अध्यादेशमार्फत कानुनी अफ्ठ्याराहरू, बाधाहरू, लगानीको कुरा होस्, चाहे सुशासनको कुरा होस्, हामीले केही हदसम्म फुकाउने कोसिस गरेका छौँ । यो पर्याप्त भने छैन । अहिले पनि हामीले कानुनी जटिलतालाई व्यवस्थित गर्ने, फुकाउने कुराहरू गर्न बाँकी छ । र, कार्यान्वयन र लागू गर्ने प्रयासमा हामी छौँ ।’

मन्त्री राईले वषौँदेखि सफल उद्योग व्यवसायीहरूलाई, नयाँ लगानीकर्ताहरूलाई, नयाँ प्रविधिका साथ नेपाललाई माथि उठाउन लाग्नुभएका युवा उद्यमीहरूलाई प्रोत्साहन गर्नका लागि कर्पोरेट मिडियाले गरेको कामको प्रशंसा गर्नुभयो । मिडियाको माध्यमबाट नेपाली उद्योगी–व्यसायीको क्षमता उजागर गरेर सम्मान समेत गरेकोमा धन्यवाद ज्ञापन गर्नुभयो । यस्तै, सम्मानित सबैलाई हार्दिक बधाइ तथा शुभकामना पनि व्यक्त गर्नुभयो ।

कर्पोरेट मिडिया ग्रुपले बिहीबार १७औँ संस्करणको ‘कर्पोरेट बिजनेश अवार्ड, २०२५’ भव्य रूपमा सम्पन्न गरेको छ । यो संस्करणमा ११ वटा विधामा २४ वटा अवार्ड र एक जनालाई लाइफटाइम एचिभमेन्ट अवार्ड प्रदान गरिएको छ ।

यी समाचारहरू पनि पढ्नुहोस्–

एक्लैले केही गर्न नसक्ने भन्दै कृषिमन्त्री अधिकारीले खोज्नुभयो निजी क्षेत्रको साथ (भिडिओ)

कर्पोरेट बिजनेश अवार्डबाट उद्योगी–व्यवसायीहरू सम्मानित, कुन सम्मान कसले पाउनुभयो ?

आईजे ग्रुपका अध्यक्ष श्रेष्ठले पाउनुभयो ‘कर्पोरेट लाइफटाइम एचिभमेन्ट अवार्ड’, को हुनुहुन्छ उहाँ ?