‘लाइसेन्स खारेज’काे प्रकृयामा क्रिष्टल फाइनान्स, १५ दिन भित्र निक्षेप भुक्तानी दावी गर्न आह्वान

काठमाडौं । क्रिष्टल फाइनान्सले निक्षेप दाबी गर्न आह्वान गरेको छ । कम्पनी खारेज प्रक्रियामा रहेकाले फाइनान्समा जम्मा गरिएको निक्षेप दाबी गर्न कम्पनीले आग्रह गरेको हो ।

खारेजीको प्रक्रियामा रहेको साविक क्रिष्टल फाइनान्समा निक्षेप खाता रहेका व्यक्ति, संघ तथा संस्थाहरुले १५ दिन आफ्नो लिन बाँकी निक्षेप भुक्तानी दावी पेश गर्न कम्पनीले अनुरोध गरेको हो ।

निक्षेप दाबी गर्दा निक्षेपकर्ताको खातामा रहेको नाम, निक्षेप रकम, निक्षेपकर्ताको दस्तखत (खाता खोल्दा वखतको), नागरिकताको प्रमाण पत्रको प्रतिलिपी, कम्पनी, संघ तथा संस्थाहरुको हकमा दर्ता तथा प्यान प्रमाण पत्रको प्रतिलिपी र नेपाल राष्ट्र बैंकको ग्राहक पहिचान कार्यविधी बमोजिमको अन्य आवश्यक कागजातहरु र फोटो पनि पेश गर्नुपर्ने बताएको छ ।

दामासाही सम्बन्धी ऐन, २०६३ को दफा २२ को उपदफा (१) को खण्ड (ख) बमोजिम कम्पनीलाई ऋण प्रदान गर्ने सम्पूर्ण साहुहरुलाई १५ दिनभित्र आफनो ऋण दाबी पेश गर्न यस अघिनै सूचना जारी गरिसकेको कम्पनीले जनाएको छ ।

वित्तीय अवस्था बिग्रिएपछि यो कम्पनीलाई राष्ट्र बैंकले विसं २०६९ मा समस्याग्रस्त घोषणा गरेको थियो । उच्च अदालत पाटनको विसं २०७२ कात्तिक २० गतेको फैसलाअनुसार राष्ट्र बैंकले २०७७ भदौमा यो कम्पनीको लाइसेन्स खारेज गरेको थियो ।