भुलभुले दूधकुण्ड, भालुखोला र साप्सुढापमा सांस्कृतिक मेला

काठमाडौँ । धार्मिक तथा पर्यटकीयस्थल भुलभुले दूधकुण्ड, भालुखोला र साप्सुढापमा सांस्कृतिक मेला लागेको छ ।

दिक्तेल रूपाकोट मझुवागढी नगरपालिका–२ सोल्माको भालुखोला, वडा नं.–६ नेर्पाको भुलभुले दूधकुण्ड र वडा नं.–९ निर्मलीडाँडाको साप्सुढापमा ऋषितर्पणी पूर्णिमाको अवसरमा शुक्रबार बिहानदेखि मेला लागेको हो ।

वर्षमा एक पटक लाग्ने मेला भर्न र दर्शन गर्न जिल्लाका विभिन्न ठाउँबाट स्थानीय सो ठाउँमा पुगेका छन् । देउधामहरुमा लाग्ने सांस्कृतिक मेला खेतीपातीको काम सकिएपछि लाग्ने भएकाले पनि पूजाआजा गर्नेको भीड हुने गरेको स्थानीय बासिन्दाले बताएका छन् ।

किराँत र हिन्दु धर्मावलम्बीको धार्मिकस्थलका रुपमा रहेको भुलभुले दूधकुण्डमा शिव, गणेश, बुढानिलकण्ठ, तीनकन्यदेवी, सिद्धसिकारी र यलम्बरको पूजाआजा गर्न आन्तरिक तथा बाह्य दर्शनार्थी आउने गरेका व्यवस्थापन समितिले जनाएको छ । चिताएको मनोकाङ्क्षा पूरा हुने विश्वासमा भाकल गर्ने र दर्शन गर्नका लागि भुलभुले दूधकुण्डमा लाग्ने मेलामा प्रायः बुढापाका र केटाकेटीदेखि युवायुवती आउने गरेका छन् ।

पछिल्लो समयमा आन्तरिक तथा बाह्य पर्यटकको गन्तव्य थलो बनेको भुलभुले दूधकुण्डमा दिनभर ढोल, ढ्याङग्रो र झ्याम्टा बजाउँदै धामीहरु नाच्ने गर्छन् । मेलामा धामीका साथमा आएका आफन्तले धामी/झाँक्रीसँगै गीत गाउँदै र नाच्दै रमाइलो गरेको दृश्यावलोकन गर्ने उत्तिकै हुन्छन् ।

परापूर्वकालदेखि जलकन्या देवीको पूजाआजा गरिँदै आइएको भालुखोलामा धामी/झाँक्री गीत तथा ढोल, ढ्याङ्ग्रो र झ्याम्टाको आवाजले गुञ्जायमान भएको पुजारी दीर्घराज राईले बताए । प्रचारप्रसारको अभावमा ओझेलमा परेको भालुखोलामा धार्मिक पर्यटन प्रवद्र्धनका लागि विसं २०४५ सालमा देवस्थलकारुपमा विकास गरिएको हो ।

उता, ऋषितर्पणी पूर्णिमाको अवसर पारेर धार्मिक तथा पर्यटकीयस्थल साप्सुढापमा पनि ठूलो मेला लागेको स्थानीय बासिन्दा एवम् नेकपा (माओवादी केन्द्र)का युवा नेता मिलनचन्द्र राईले जानकारी दिएका छन् । दिक्तेल रूपाकोट मझुवागढी नगरपालिकाको लगानीमा स्तरोन्नति गरिएको साप्सुढालमा विशेषगरी खोला तथा सिद्धसिकारीको पूजा गर्दै धामी/झाँक्रीले शक्ति आर्जनका लागि प्रार्थना गर्ने गरेका छन् ।