विद्युतीय सवारीको भन्सार दर अझ घट्ने: मन्त्री भुसाल

काठमाडौं ।   विद्युतीय सवारीको भन्सार दर अझ घट्ने ऊर्जा,जलस्रोत तथा सिंचाई मन्त्री पम्फा भुसालले बताएकी छिन् । मंगलबार राजधानीमा आयोजित वैकल्पिक ऊर्जा प्रवर्द्धन केन्द्रको २५ औं वार्षिकोत्सवको अवसरमा आयोजित कार्यक्रममा मन्त्री भुसालले यस्तो बताएकी हुन् ।

पछिल्लो समय मुलुकमा चाहिने भन्दा पनि अझ बढी जलविद्युतको उत्पादन भएकाले यसको प्रयोग अब वैकल्पिक ऊर्जाको रुपमा ग्यास तथा पेट्रोलियम पदार्थको विस्थापनमा प्रयोग गर्नुपर्ने मन्त्री भुसालको भनाइ छ ।​ ‘अहिले हामीसँग प्रशस्त मात्रामा जलविद्युतको उत्पादन भएको छ । जुन हामीले प्रयोग गरेर पनि अझ बढी हुने अवस्थामा छ,’ मन्त्री भुसालले भनिन्, ‘अब हामीले यसलाई नवीकरणीय ऊर्जा स्रोतको रुपमा पेट्रोलियम पदार्थको ठाउँ प्रयोग गर्नुपर्छ ।

खाना पकाउने ग्यासको ठाउँमा विद्युतीय चुलो प्रयोग गर्नुपर्छ,पेट्रोलियम गाडीको सट्टा अब विद्युतीय सवारी चलाउनुपर्छ । यसका लागि के कसरी प्रोत्साहन गर्न सकिन्छ,हामी सोच्दै छौं’,मन्त्री भुसालले भनिन् । त्यसो त पेट्रोलियम पदार्थ तथा सोबाट चल्ने गाडीको आयातमा क्रमशः विस्थापन गर्नकै लागि सरकारले विद्युतीय गाडीको भन्सार दर घटाउने बताइन् । यसका लागि सरकार अहिले गृहकार्यमै रहेको उनको भनाइ छ ।

यसका साथै जलविद्युतको घरायसी प्रयोगमा समेत प्रत्साहन तथा सहुलियता प्रदान गर्ने उद्देश्यले सरकारले नीति तथा कार्यक्रम अघि सारेको उनले बताइन् । हाल जलविद्युतको प्रसस्त उत्पादनका कारण स्वदेशी बजारले मात्र खपत गर्ने अवस्थामा नरहेकाले विदेशमा समेत निर्यात गर्ने गरी सरकार अघि बढिसकेको उनले बताइन् । यसका लागि भारत,बंगलादेशसहित अन्य देशसँग समेत विद्युत निर्यातका लागि सम्झौताकै चरणमा रहेको मन्त्री भुसालले जानकारी दिइन् ।