डेङ्गीबाट एक जनाको मृत्यु, हैजाले पनि जोखिम निम्त्याउँदै

लामखुट्टेको टोकाइबाट सर्ने रोग डेङ्गीबाट एक जनाको मृत्यु भएको छ ।

देशभर कीटजन्य तथा पानीजन्य रोगको सङ्क्रमण बढ्दै गइरहेको अवस्थामा डेङ्गीबाट एक जनाको मृत्यु भएको स्वास्थ्य सेवा विभागअन्तर्गत इपिडिमियोलोजी तथा रोग नियन्त्रण महाशाखा (इडिसिडी) ले जानकारी दिएको हो ।

गत पुसदेखि हालसम्म देशभर दुई हजार तीन सय ६५ जनाबाट सङ्क्रमित छन् । डेङ्गी सङ्क्रमण ७३ जिल्लामा फैलिएको छ । कोशी प्रदेशमा पाँच सय ३७, मधेसमा ४६, बागमतीमा सात सय ४७, गण्डकीमा पाँच सय आठ, लुम्बिनीमा दुई सय ४७, कर्णालीमा ३८ र सुदूरपश्चिममा दुई सय ४२ जना सङ्क्रमित भएका हुन् ।

काठमाडौँ उपत्यकामा दुई सय ८७, कास्कीमा एक सय ३७, झापामा एक सय ३३, चितवनमा एक सय १६ र तनहुँमा एक सय १० जना सङ्क्रमित छन् ।

त्यसैगरी, हैजा सङ्क्रमितको सङ्ख्या पनि बढ्दै गएको छ । देशभर ३० जनामा हैजा पुष्टि भएको इडिसिडीले जनाएको छ । हालसम्म हैजाबाट कसैको पनि मृत्यु भएको छैन ।