कोरियाको पुँजी र प्रविधि नेपाल भित्र्याउन चाहन्छौँ : मन्त्री भण्डारी

दक्षिण कोरिया । दक्षिण कोरियाको भ्रमणमा रहेका उद्योग, वाणिज्य तथा आपूर्तिमन्त्री दामोदर भण्डारीले कोरियाको पुँजी र प्रविधि नेपाल भित्र्याउन चाहेको बताएका छन् ।

नेपाल र गणतन्त्र कोरियाबीच कूटनीतिक सम्बन्ध विस्तारको ५० वर्ष पुगेको अवसरमा कोरियास्थित नेपाली राजदूतावास र बुसान च्यामबर अफ कमर्स कोरियाद्वारा आयोजित कार्यक्रममा सम्बोधन गर्दै उनले कोरियन लगानीकर्तालाई नेपालमा लगानी गर्न आग्रह गरे । उनले नेपालमा गरिएको वैदेशिक लगानीको सुरक्षाका लागि नेपाल सरकार प्रतिबद्ध रहेको बताए ।

आगामी दिनमा नेपाल र कोरियाबिचको आपसी सम्बन्ध थप उचाइमा पुराउनुपर्ने बताउँदै उनले नेपालको उद्योग, व्यापार तथा पर्यटन क्षेत्रको विकासमा लगानी गर्न आग्रह गरे । महत्त्वपूर्ण व्यापार साझेदारका रूपमा रहेको कोरियाको भौतिक विकास, ज्ञान, सीप र प्रविधिलाई नजिकबाट नियाली रहेको र कोरियामा भइरहेको विकासबाट नेपालीहरूलाई थप लाभान्वित गर्न चाहेको उनले बताए ।

मन्त्री भण्डारीले भने, ‘सामसङ इलेकट्रोनिक्स र हुण्डाई मोटर्सले आफ्नो प्लान्ट स्थापना गरी उत्पादन सुरू गरेका छन् भने कोरियाले अपर त्रिसुलीमा गरेको लगानीले यस क्षेत्रको विकासमा महत्त्वपूर्ण योगदान पुगेको छ । वैदेशिक लगानीका दृष्टिकोणबाट कोरिया महत्त्वपूर्ण साझेदार हो । नेपालमा दिन प्रतिदिन लगानीको वातावरण थप सुधार भइरहेको अन्तर्राष्ट्रिय संस्थाहरूको मूल्याङ्कनले समेत पुष्टि गरेको छ । नेपालमा युवा जनशक्ति, कच्चापदार्थको उपलब्धता, भौगोलिक विविधताले समेत लगानीको प्रतिफल प्राप्त हुने देखिन्छ । भारत, चीन, बङ्गलादेशलगायतको बजारका कारणले समेत नेपाल सम्भावना भएको मुलुक हो । नेपालमा लगानी गरी व्यवसाय प्रवर्द्धन र थप रोजगारी सिर्जना गर्न कोरियन लगानीकर्ताहरूलाई आग्रह गर्दै सरकारका तर्फबाट गर्नुपर्ने सबै किसिमको सहजीकरण गर्न प्रतिबद्धता व्यक्त गर्दछु ।’

मन्त्री भण्डारीले नेपाली युवालाई रोजगारी प्रदान गरेकोमा ईपीएस कोरिया र कोरिया सरकारलाई धन्यवाद व्यक्त गरे । उनले भने, ‘नेपाली युवाले यहाँ गरेको आम्दानी र सिकेको सीपलाई सदुपयोग गरी नेपालमा उत्पादन र रोजगारीका अवसर बढाउनतर्फ लागेका छौँ ।’