ह्याम्स मोटर्सका सीईओ दीपक थापालाई ‘बेष्ट अटोमोटिभ एक्सिलेन्स’ अवार्ड (भिडिओ)

काठमाडौं । ह्याम्स मोटर्सका प्रमुख कार्यकारी अधिकृत (सीईओ) दीपक थापाले ‘बेष्ट अटोमोटिभ एक्सिलेन्स’ प्राप्त गर्नुभएको छ ।

कर्पोरेट म्यागजिनले उहाँलाई सो अवार्ड प्रदान गरेको हो ।

बिहीबार र्‍याडिसन होटेलमा आयोजित १७औँ संस्करणको ‘कर्पोरेट बिजनेश अवार्ड’ समारोहमा उहाँलाई ‘बेष्ट अटोमोटिभ एक्सिलेन्स’ अवार्ड प्रदान गरिएको कर्पोरेट म्यागजिनका संस्थापक सम्पादक उज्वलजंग शाहले जानकारी दिनुभयो ।

कार्यक्रमका प्रमुख अतिथि रक्षामन्त्री मानवीर राई, अवार्ड छनोट समिति संयोजक तथा नेपाल उद्योग वाणिज्य महासंघ (एफएनसीसीआई) की पूर्व अध्यक्ष भवानी राणा, कर्पोरेट मिडियाकी उपाध्यक्ष सुष्मा महरालगायतले उहाँलाई अवार्ड प्रदान गर्नुभएको थियो ।

दीपक थापाबारे

मध्यमवर्गीय परिवारमा वि.स. २०२० पुस ९ गते पिता मेजर लोकबहादुर थापा र माता साबित्री थापाबाट ललितपुरको कुपण्डोलमा जन्मिुनभएका दीपक थापा ह्याम्स मोटरको प्रमुख कार्यकारी अधिकृत (सीईओ) हुनुहुन्छ । उहाँका बुबा सेनामा कार्यरत रहनुभएका कारण घरमा कडा अनुशासनभित्र बस्नुपथ्र्यो । कडा अनुशासनको घेराभित्र रहेका कारण घरका कोही पनि सदस्यलाइ आफूखुसी गर्ने तथा गलत बाटो समाउने छुट थिएन ।

प्रगति शिक्षा सदनबाट औपचारिक विद्यालय शिक्षा आरम्भ गर्नुभएका उहाँले पद्मोदय हाइ स्कुलबाट प्रवेशिका परीक्षा (एसएलसी) र नेपाल कमर्स क्याम्पसबाट वाणिज्य शास्त्रमा डिप्लोमा गर्नुभएको छ । कलेजको पढाइसँगै पाँचतारे होटेल अन्नपूर्णमा काम गर्न थाल्नुभएका थापाले त्यही बीचमा आफ्नै चाहना अनुसार तत्कालीन शाही नेपाली सेनामा जागिर खाने निधो गर्नुभयो । सेनाको अधिकृतमा छनोट पनि हुनुभयो । तर, तालिमको क्रममा खुट्टा भाँच्चिएपछि जागिर छोड्न बाध्य हुनुभयो । यसबाट आफूले चाहँदैमा सबै कुरा प्राप्त नहुँदोरहेछ भन्ने शिक्षा उहाँले पाउनुभयो ।

सेनाको जागिरलाई निरन्तरता दिन नसक्नुभएका थापाले त्यसपछि तत्कालीन अरुण कन्टिनेन्टल प्रालि हालको सीजी मोटोकर्पबाट अटोमोबाइल क्षेत्रमा प्रवेश गर्नुभयो । तीन दशकदेखि उहाँ यही क्षेत्रमा क्रियाशील रहँदै मुलुकको अर्थतन्त्रमा महत्वपूर्ण सहयोग पुर्‍याउँदै आउनुभएको छ । समग्र अटोमोबाइल व्यवसायीहरूको छाता संस्था ‘नाडा अटोमोबाइल एसोसिएशन अफ नेपाल’को महासचिवसम्म हुनुभएका उहाँले त्यस संस्थामा रहेर ६ कार्यकाल काम गर्नुभयो । त्यसबीचमा व्यवसायीका अनेक समस्याबारे सरकार र सरोकारवाला निकायहरूसँग छलफल, बहस अनि पैरवी गर्नुभएको थियो ।

नेपाल चेम्बर अफ कमर्स र नेपाल श्रीलंका चेम्बर अफ कमर्समा समेत आबद्ध रहनुभएका उहाँ विभिन्न सामाजिक संघसंस्थामा रहेर समाजसेवामा क्रियाशील हुनुहुन्छ । भीईसीभी आइचर कमर्सियल भेहिकल्स इन्डियाबाट ‘ट्वान्टी इयर्स सर्भिस एवार्ड’ पाउनुभएका उहाँले देशभित्र विभिन्न पुरस्कार र सम्मानहरू पनि प्राप्त गर्नुभएको छ ।