धरहरा पार्किङ र व्यवस्थापनको जिम्मा काठमाडौं महानगरलाई

फाइल तस्बिर ।

काठमाडौं । धरहरा क्षेत्रमा निर्माण भएको संरचनामा सवारी साधन पार्किङ सञ्चालनको व्यवस्थापन काठमाडौं महानगरपालिकाले गर्ने भएको छ ।

काठमाडौंको सुन्धरास्थित धरहरा क्षेत्रमा शुक्रबार बसेको नेपाल सरकार र काठमाडौं महानगरबीच भएको संयुक्त बैठकले धरहरा क्षेत्रमा निर्माण भएको संरचनाभित्र सवारी साधन पार्किङ सञ्चालनलाई थप प्रभावकारी बनाउने र यसका लागि महानगरले महानगर प्रहरी बललाई परिचालन गर्ने निर्णय गरेको हो ।

बैठकले धरहरा क्षेत्रको सञ्चालन गर्नको लागि तत्काल र दीर्घकालीन योजना, परियोजना सञ्चालन, प्रारूप सम्बन्धमा अध्ययन विश्लेषण गरी सुझावसहित पेश गर्न शहरी विकास मन्त्रालय र काठमाडौँ महानगरपालिकाले तोकेका पदाधिकारीको संयुक्त समिति गठन गर्ने निर्णय गरेको छ भने धराहराको बाहिरी संरचनाका सम्बन्धमा आवश्यक र उपयुक्त कार्य गर्न काठमाडौँ महानगरलाई जिम्मा दिने निर्णय भएको काठमाडौं महानगरपालिकाकी कार्यवाहक प्रमुख सुनिता डंगोलले जानकारी दिइन् ।

उनले समग्र धरहरा सञ्चालनका लागि पूर्ण रुपमा महानगरलाई हस्तान्तरण गर्न आग्रह गरिएको बताइन् ।

त्यस्तै शहरी बिकास मन्त्री प्राडा कुमार इङ्नामले सुन्धाराको बाहिर स्वरुपको व्यवस्थापन काठमाडौं महानगरले गर्नेगरि सहमति भएको बताए। यसको सम्पूर्ण आर्थिक दायित्व महानगरले लिने उनले बताए । उनले पाकिङ्ग र सुरक्षाको विषय महानगरले तत्कालै अघि बढाउने उल्लेख गरे ।

मन्त्री इङ्नामले महानगरको माग बमोजिम धरहराको पुरै व्यवस्थापन हस्तान्तरणका लागि समिति गठन गरिने र समितिले आवश्यक मोडालिटी तयार गर्ने जानकारी दिए । छलफलमा गृहमन्त्री ओम प्रकाश अर्याल लगाएत अन्य सरोकारवाला निकायका प्रतिनिधिहरुको समेत उपस्थिति रहेको थियो ।