डिशहोमद्वारा क्रिकेट खेलाडीलाई नगद पुरस्कार हस्तान्तरण

नेपाली क्रिकेट टीमलाई प्रोत्साहितत र प्रवर्द्धन गर्न पाउँदा उत्साहित छौँ : सुदिप आचार्य

काठमाडौं । डिशहोमले आईसीसी टी–२० आई विश्वकप छनोटअन्तर्गत घोषणा गरेको पुरस्कार रकम खेलाडीलाई हस्तान्तरण गरेको छ ।

हिजो आइतबार कम्पनीको मुख्य कार्यालयमा आयोजित कार्यक्रममार्फत पुरस्कार जित्ने खेलाडीहरूलाई नगद पुरस्कार प्रदान गरेको हो ।

कार्यक्रममा नेपाल क्रिकेट संघका सचिव पारस खड्का, मुख्य प्रशिक्षक मोन्टी देसाइ, कप्तान रोहित कुमार पौडेल लगायत अन्य खेलाडीहरू पनि उपस्थित थिए ।

गएको अक्टोबर २९ देखि सुरू भएको आईसीसी टी–२० आई विश्वकप एसिया क्षेत्र छनोटको खेलमा डिशहोम फाइबरनेटले ‘अब इतिहास रच्ने पालो हाम्रो’ भन्ने नारासहित नगद पुरस्कार घोषणा गरेको थियो ।

डिशहोमले खेलमा शतक प्रहार गर्ने नेपाली खेलाडीले १० लाख रुपैयाँ र एकै खेलमा शतक र पाँच विकेट लिने खेलाडीले २० लाख रुपैयाँ दिइने घोषणा गरेको थियो । एकै खेलमा पाँच विकेट लिएमा पाँच लाख, अर्धशतक बनाएमा एक लाख, कम्तीमा तीन विकेट लिएमा एक लाख, कम्तीमा ३५ रन बनाएमा ५० हजार र कम्तीमा तीन क्याच वा स्टम्पिङ गर्ने खेलाडीलाई ५० हजार रुपैयाँ पुरस्कार घोषणा गरेको थियो ।

सोही अनुसार खेलाडीहरूलाई पुरस्कार प्रदान गरिएको कम्पनीले जनाएको छ । कार्यक्रममा डिशहोमका प्रबन्ध निर्देशक सुदीप आचार्यले नेपाली टोलीलाई समर्थन गर्न र नेपाली क्रिकेटको प्रवर्द्धन गर्न पाउँदा उत्साहित रहेको बताए । ‘हाम्रो प्रतिबद्धता क्यानलाई आवश्यक स्रोत र सहयोग उपलब्ध गराउनु हो,’ उनले भने ।