अमेरिकी आईटी कम्पनी जेल्डा सेक्युरेटीका सीओओ दिवेश श्रेष्ठलाई कर्पोरेट अवार्ड (भिडिओ)

काठमाडौं । अमेरिकी आईटी कम्पनी जेल्डा सेक्युरेटी एलएलसीका चिफ अपरेटिङ अफिसर (सीओओ) दिवेश श्रेष्ठले कर्पोरेट बिजनेश अवार्ड प्राप्त गर्नुभएको छ ।

कर्पोरेट म्यागजिनले उहाँलाई सो अवार्ड प्रदान गरेको हो ।

बिहीबार र्‍याडिसन होटेलमा आयोजित १७औँ संस्करणको ‘कर्पोरेट बिजनेश अवार्ड’ समारोहमा उहाँलाई ‘इमर्जिङ युथ अन्टरप्रेनर’ अवार्ड प्रदान गरिएको कर्पोरेट म्यागजिनका संस्थापक सम्पादक उज्वलजंग शाहले जानकारी दिनुभयो ।

कार्यक्रमका प्रमुख अतिथि रक्षामन्त्री मानवीर राई, अवार्ड छनोट समिति संयोजक तथा नेपाल उद्योग वाणिज्य महासंघ (एफएनसीसीआई) की पूर्व अध्यक्ष भवानी राणा, कर्पोरेट मिडियाकी उपाध्यक्ष सुष्मा महरालगायतले उहाँलाई अवार्ड प्रदान गर्नुभएको थियो ।

दिवेश श्रेष्ठबारे

सूचना तथा प्रविधि (आईटी) क्षेत्रमा १५ वर्ष लामो अनुभव सँगाल्नुभएका दिवेश श्रेष्ठ अमेरिकी आईटी कम्पनी जेल्डा सेक्युरेटी–एलएलसीको चिफ अपरेटिङ अफिसर (सीओओ) हुनुहुन्छ । बिक्री सञ्चालन, सम्पत्ति व्यवस्थापन, सम्झौता अनुपालन र वित्तीय इन्जिनीयरिङमा उत्कृष्ट क्षमता राख्नुहुने श्रेष्ठ वित्त र परियोजना व्यवस्थापनमा अब्बल मानिनुहुन्छ ।

उहाँले अमेरिकाको ब्रिङहम योङ्ग युनिभर्सिटीअन्तर्गत मेरियट स्कुल अफ म्यानेजमेन्टबाट कर्पोरेट फाइनान्समा ग्राजुयट गर्नुभएको छ । डाटाबेस एप्लिकेशन, प्रोग्रामिङ ल्याङ्ग्वेज, सीआरएम टुल्स, साइबर सेक्युरेटी र जीआरसी टुल्समा विशेष दक्षता राख्नुहुने उहाँले माइक्रोसफ्ट सर्टिफाइड प्रोफसनल (एमसीपी), सफ्टवेयर असेट म्यानेजमेन्ट (एसएएम) र ईएमसी प्रुभन प्रोफेसनल सर्टिफाइडलगायत थुप्रै प्रमाणपत्रहरू प्राप्त गर्नुभएको छ ।

उहाँले अमेरिकाको सान्टा क्लारामा अवस्थित डेल ईएमसी कम्पनीको एरिया फाइनान्स म्यानेजर, ईएमसी कर्पको टेरिटोरी म्यानेजर, एङ्गल प्वाइन्ट ग्रुप इन्कको म्यानेजर, बे एरिया टेकवर्कर्स इन्कमा बिजनेस एनालिस्ट भएर काम गर्नुभएको छ ।

हेर्नहोस् भिडिओ–