दोलखाका सामुदायिक विद्यालयमा पठनपाठन सुरू गर्न गाउँपालिकाको निर्देशन

दोलखा । जिल्लाको बैत्येश्वर गाउँपालिकाले गाउँपालिकाभित्र रहेका सबै सामुदायिक विद्यालयहरूलाई तत्काल पठनपाठन सुचारु गर्न निर्देशन दिएको छ ।

आज सोमबार सूचना जारी गर्दै गाउँपालिकाले भोलि मंगलबारदेखि नै भर्नालगायतका कक्षा सञ्चालन गर्न निर्देशन दिएको हो ।

नयाँ शैक्षिक सत्र सुरू भए पनि शिक्षक आन्दोलनको प्रभावले विद्यालय सञ्चालनमा ढिलाइ भएपछि विद्यार्थी भर्ना, पाठ्यपुस्तक वितरण र कक्षा सञ्चालन सुरू नहुँदा बालबालिकाको शैक्षिक अधिकार र मनोवैज्ञानिक अवस्था प्रभावित भएको भन्दै गाउँपालिकाले विद्यालय सञ्चालनका लागि निर्देशन जारी गरेको उल्लेख गरेको छ ।

गाउँपालिकाका अध्यक्ष छवि लामाले हस्ताक्षर गरेको सूचनामा भनिएको छ, ‘सम्पूर्ण सामुदायिक विद्यालयले शैक्षिक तथा प्रशासनिक कार्यहरू मिति २०८२ साल वैशाख ९ गतेदेखि अनिवार्य रुपमा सुरु गर्नु पर्नेछ ।’

शिक्षक आन्दोलनको प्रभावले विद्यालय सञ्चालनमा ढिलाइ भएको छ । शिक्षकहरुले स्थायी नियुक्ति, तलब वृद्धि, सेवा सुरक्षालगायतका माग राख्दै आन्दोलन गरिरहेका छन्, जसले शैक्षिक गतिविधिमा अवरोध पुर्‍याएको छ ।