ट्रम्पको विधेयकलाई मस्कको चुनौती

काठमाडौं । अमेरिकी राष्ट्रपति डोनाल्ड ट्रम्पले अर्बपति एलन मस्कसँगको आफ्नो सम्बन्ध समाप्त भएको बताएका छन् । ट्रम्पले मस्कलाई विपक्षी डेमोक्र्याटहरूलाई समर्थन गरे भने उनले गम्भीर परिणाम भोग्नुपर्ने चेतावनी पनि दिएका छन् ।

ट्रम्प र मस्कबीच ‘बिग ब्युटिफुल बिल’ लाई लिएर विवाद बढिरहेको छ । ट्रम्प यस विधेयकको समर्थनमा छन् भने मस्क यसको विपक्षमा छन् । यो विधेयक मे २२ मा तल्लो सदन अमेरिकी कंग्रेसमा केवल १ मतको अन्तरले पारित भएको छ ।

यसको समर्थनमा २१५ र विपक्षमा २१४ मत रह्यो । अहिले यो सिनेटमा विचाराधीन छ । यसलाई जुलाई ४, २०२५ सम्ममा सिनेटबाट पारित गर्नुपर्ने छ ।

मस्क ट्रम्पको यो विधेयकको विरोधमा खुलेर लागेका छन् । ट्रम्पले यो ‘देशभक्तिले भरिएको’ कानुन भएको दाबी गरेका छन् । यो विधेयक पारितमा भएमा अमेरिकामा लगानी बढ्ने र चीनमाथिको निर्भरता घट्ने उनको विश्वास छ । तर, मस्कले यसलाई ‘बेकारको खर्चले भरिएकोे’ विधेयक भनेका छन् ।

रिपोर्टका अनुसार मस्कले यो विधेयक पारित हुनबाट रोक्न ३ रिपब्लिकन सांसदहरूलाई आफ्नो पक्षमा पारेका छन् ।

मस्कले यसलाई सरकारी अनुदान वितरण गर्ने ‘लुट कागजात’ भनेका छन् । यसले राष्ट्रिय घाटा २.५ ट्रिलियन डलरले बढाउने उनको दाबी छ । साथै, उनले रिपब्लिकन सांसदहरूलाई यस विधेयकलाई समर्थन गर्नेहरूविरुद्ध २०२६ को मध्यावधि चुनावमा विरोध गर्ने चेतावनीसमेत दिएका छन ।

रान्ड पल, रोन जोनसन र माइक ली जस्ता केही रिपब्लिकन सिनेटरहरू खुलेआम मस्कको समर्थनमा छन् भने उनीहरूले विधेयकमा परिवर्तन चाहेको बताएका छन् । यी सांसदहरूले विधेयकको विरुद्धमा मतदान गर्ने बताएका छन् ।

ट्रम्पले यसलाई आफ्नो आर्थिक योजनाको मेरुदण्ड मानेका छन्, तर यदि मस्कको पैरवीले प्रभाव जारी राख्यो भने ट्रम्पले विधेयक परिवर्तन गर्न मात्र नभई आफ्नै पार्टीमा समर्थन जुटाउन पनि फरक रणनीति अपनाउनुपर्ने हुन सक्छ ।

यस विधेयकले विद्युतीय सवारीसाधन र सौर्य ऊर्जाका लागि जो बाइडेन सरकारले दिएको कर छुट समाप्त गर्ने प्रस्ताव गरेको छ, जसले मस्कको कम्पनी टेस्लालाई हानि पुर्‍याउन सक्छ ।

अमेरिकी सिनेटमा रिपब्लिकनहरूको ५३–४७ को बहुमत छ । ३ जना सिनेटरहरूले पहिले नै विधेयकको विरुद्धमा मतदान गर्ने बताएका छन् । यस्तो अवस्थामा कुरा ५०–५० मा आइपुगेको छ । यदि थप १ जना सांसदले पनि यो विधेयकको विरुद्धमा मतदान गरे भने ट्रम्पले यो विधेयक पारित गराउन सक्ने छैनन् ।

यदि यो विधेयक सिनेटमा पारित भएन भने यसलाई प्रतिनिधिसभामा फेरि एक पटक पारित गर्नुपर्ने हुन्छ । जबकि ट्रम्पले यो विधेयक यसअघि केवल १ मतको अन्तरले पारित गराउन सफल भएका थिए ।

मस्कको विरोधका बाबजुद पनि ट्रम्पले यो विधेयक पारित गराउन प्रयास गरिरहेका छन् । उनले धेरै सिनेटरहरूसँग भेटेका छन् र फोनमा पनि कुरा गरेका छन्, ताकि उनीहरूलाई विधेयकको समर्थनमा मतदान गर्न मनाउन सकियोस् ।