काठमाडौं । एआरएस डेन्टल क्लिनिक, लाजिम्पाटकका प्रबन्ध निर्देशक डा. श्यामकाजी महर्जनले ‘एक्सिलेन्स इन हेल्थ सर्भिस अवार्ड, २०२५’ प्राप्त गर्नुभएको छ ।
कर्पोरेट म्यागजिनले उहाँलाई सो अवार्ड प्रदान गरेको हो ।
बिहीबार काठमाडौंको लाजिम्पाटस्थित र्याडिसन होटेलमा आयोजित ‘कर्पोरेट बिजनेश अवार्ड, २०२५’ समारोहमा उहाँलाई सो अवार्ड प्रदान गरिएको कर्पोरेट म्यागजिनका संस्थापक सम्पादक उज्वलजंग शाहले जानकारी दिनुभयो ।
कार्यक्रमका प्रमुख अतिथि रक्षामन्त्री मानवीर राई, अवार्ड छनोट समिति संयोजक तथा नेपाल उद्योग वाणिज्य महासङ्घ (एफएनसीसीआई) की पूर्वअध्यक्ष भवानी राणा, कर्पोरेट मिडियाकी उपाध्यक्ष सुष्मा महरालगायतले उहाँलाई अवार्ड प्रदान गर्नुभएको थियो ।
डा. श्यामकाजी महर्जनबारे
डा. श्यामकाजी महर्जन नेपालको दन्त चिकित्सा क्षेत्रमा प्रतिष्ठित नाम हो । उहाँको योगदानले नेपाली दन्त चिकित्सालाई अन्तर्राष्ट्रियस्तरमा स्थापित गर्न महत्वपूर्ण भूमिका खेलेको छ । यही योगदानको कदरस्वरूप सन् २०२२ मा ग्लोबल समिट इन्स्टिच्युट अमेरिकाले उहाँलाई ‘विश्वका शीर्ष १०० चिकित्सक’ मा समेत सूचीकृत गरेको थियो ।
उहाँले सन् २००६ मा त्रिभुवन विश्वविद्यालय, पिपल्स डेन्टल कलेज एण्ड हस्पिटलबाट ब्याचलर अफ डेन्टल सर्जरी (बीडीएस) तथा २०१३ मा प्रोस्थोडोन्टिक एण्ड म्याक्सिलोफेसियल प्रोस्थेसिसमा मास्टर अफ डेन्टल सर्जरी (एमडीएस) गर्नुभएको छ ।
हाल उहाँ एआरएस डेन्टल क्लिनिक, लाजिम्पाटकाका प्रबन्ध निर्देशक हुनुहुन्छ । एआरएस डेन्टल क्लिनिक योग्य दन्त चिकित्सक तथा विशेषज्ञहरूको समूहद्वारा स्थापना गरिएको हो । यसले नवीनतम प्रविधि अपनाई किफायती मूल्यमा उच्च गुणस्तरीय दन्त उपचार सेवा प्रदान गर्दै आएको छ ।
यस्तै, डा. महर्जन पिपल्स डेन्टल कलेजको प्रोस्थोडोन्टिक एण्ड म्याक्सिलोफेसियल प्रोस्थेसिस डिपार्टमेन्टमा एसोसिएट प्रोफेसरका रूपमा पनि कार्यरत हुनुहुन्छ । साथै, उहाँ डेन्टल एकेडेमी नेपालका अध्यक्ष तथा नेपाल ओरल इम्प्लान्ट एसोसिएशन (एनओआईए) का अध्यक्ष पनि हुनुहुन्छ ।
उहाँले राष्ट्रिय तथा अन्तर्राष्ट्रियस्तरमा थुप्रै शोधहरू प्रस्तुत गर्नुभएको छ भने भारत, बङ्गलादेश, इन्डोनेसिया, फिलिपिन्स, जापान र बेलायतमा इन्टरनेशनल कीनोट स्पिकरसमेतमा आमन्त्रित वक्ता बनिसक्नुभएको छ । उहाँले सिङ्गापुरबाट ‘फेलो अफ इन्टरनेशनल कलेज अफ काउन्टिङ डेन्टल एजुकेशन (एफआईसीसीडीई)’ अवार्डका साथै वि.स. २०७३ मा ‘परिवर्तन सम्मान’ प्राप्त गर्नुभएको थियो ।
त्यसैगरी, ग्लोबल आउटरिच मेडिकल एण्ड हेल्थ एसोसिएशन (गोम्हा) द्वारा प्रोस्थोडोन्टिकमा विशिष्ट योगदानबापत सन् २०२१ मा ‘ग्लोबल आउटरिच डेन्टल अवार्ड’ र एसियन एकेडेमी अफ प्रोस्थोडोन्टिक्स (एएपी) द्वारा २०२२ मा ‘इन्डोनेसियन प्रोस्थोडोन्टिक्स सोसाइटी (आईप्रोसी)’ अवार्ड पाउनुभएको छ ।
हेर्नुहोस् भिडिओ–
FACEBOOK COMMENTS