‘केपी बा’ भन्दै दुर्गेशले प्रधानमन्त्रीलाई भने– असाध्यै भावुक भएँ

काठमाडौं । गायक दुर्गेश थापा आफ्नो गीत ‘दुश्मन हेरेको हेर्‍यै’ का कारण अहिले फेरि चर्चामा रहेका छन् । उनको यो गीत रिलिज भएको पाँच पहिनामा १० करोड पटक हेरिएपछि उनलाई बधाईको ओइरो लागेको छ । उनलाई प्रधानमन्त्री केपी शर्मा ओलीले समेत बधाई दिएका छन् ।

प्रधानमन्त्री ओलीले बधाई दिएपछि दुर्गेशले सामाजिक सञ्जालमा लेख्दै नयाँ पुस्ताको सिर्जना, अभिव्यक्ति र परिश्रमप्रति देशकै प्रधानमन्त्रीले देखाएको चासो, संवेदना र सम्मानले आफूलाई असाध्यै भावुक तुल्याएको उल्लेख गरेका छन् ।

प्रधानमन्त्री ओलीलाई केपी बा भन्ने सम्बोधन गर्दै दुर्गेशले प्रधानमन्त्रीको बधाईले आफ्नो सिर्जनात्मक यात्रामा ऐतिहासिक प्रेरणा थपिएको समेत उल्लेख गरेका छन् ।

दुर्गेशले प्रधानमन्त्रीको शब्द केवल बधाई मात्र नभएर नयाँ सोच, नयाँ ऊर्जा र नयाँ आशाको सम्बोधन भएको समेत टिप्पणी गरेका छन् ।

उनले भनेका छन्–

नयाँ पुस्ताको सिर्जना, अभिव्यक्ति र परिश्रमप्रति देशकै सम्माननीय प्रधानमन्त्रीज्यूले देखाउनुभएको चासो, संवेदना र सम्मानले मलाई असाध्यै भावुक तुल्याएको छ । ‘दुश्मन हेरेको हेर्‍यै’ गीतमा १० करोड भ्युजको सफलताप्रति सार्वजनिक रूपबाटै बधाई र शुभकामना दिई हामीलाई दिनुभएको स्नेहले मेरो सिर्जनात्मक यात्रामा ऐतिहासिक प्रेरणा थपिएको छ ।

देशको प्रधानमन्त्रीज्यूले नेपाली गीत–सङ्गीतको मूल्य र सम्भावना चिन्नुभएको यो क्षण सम्पूर्ण सिर्जनशील पुस्ताका लागि गर्वको विषय पक्कै हो । उहाँको शब्द केवल एउटा बधाई मात्र थिएन, त्यो नयाँ सोच, नयाँ ऊर्जा र नयाँ आशाको सम्बोधन थियो ।

म प्रधानमन्त्रीज्यूप्रति हार्दिक कृतज्ञता प्रकट गर्दछु । यो सबै मेरो भगवानरूपी दर्शकहरूको मायाले सम्भव भएको हो । धन्यवाद, मेरा दर्शक–श्रोताहरू, धन्यवाद प्रधानमन्त्रीज्यू, केपी बा 🙏