डोनाल्ड ट्रम्पको नजरमा एलन मस्क यसकारण बन्दैनन् अमेरिकाको राष्ट्रपति

आगामी ट्रम्प प्रशासनका महत्त्वपूर्ण पात्र एलन मस्क कुनै दिन राष्ट्रपति बन्न सक्ने सम्भावना नरहेको अमेरिकी राष्ट्रपतिमा निर्वाचित डोनाल्ड ट्रम्पले आइतबार बताएका छन् ।
ट्रम्पले मस्कले अमेरिकी राष्ट्रपति लड्ने सम्भावना नरहेको बताएका हुन् ।

एरिजोनाको फिनिक्समा आयोजित रिपब्लिकन पार्टीको सम्मेलनमा ट्रम्पले भने, ‘उहाँ राष्ट्रपति हुनुहुने छैन, यो कुरा म तपाईंलाई भन्न सक्छु ।’

ट्रम्पले थपे, ‘तपाईंलाई थाहा छ उहाँ किन अमेरिकी राष्ट्रपति हुन सक्नुहुन्न ? उहाँ यो देशमा जन्मनुभएको थिएन । उहाँ दक्षिण अफ्रिकामा जन्मिनुभएको थियो ।’

अमेरिकी संविधानमा राष्ट्रपति हुनका लागि अमेरिकामा जन्मेको अमेरिकी नागरिक हुनुपर्ने व्यवस्था छ ।

ट्रम्पले विशेषगरी डेमोक्र्याटिक समूहको आलोचनाको जवाफ दिँदै प्रविधि क्षेत्रका अर्बपति व्यवसायी र विश्वका सबैभन्दा धनी व्यक्तिलाई ‘राष्ट्रपति मस्क’ को रूपमा चित्रण गरेका थिए ।

ट्रम्पको ‘दक्षताको शक्ति’ को रूपमा काम गर्ने मस्कको प्रभावले गर्दा डेमोक्र्याटिकहरूले मस्कविरोधी प्रचारलाई केन्द्रित गर्दै एक अनिर्वाचित नागरिकले कसरी यति धेरै शक्ति प्रयोग गर्न सक्छ भन्ने प्रश्नहरू उठाएका देखिन्छ ।

मस्कले आफ्नो सोसल मिडिया प्लाटफर्म एक्समा २० करोडभन्दा बढी डेमोक्र्याटिक ‘शुभचिन्तक’ लाई यस हप्ता सरकारी कोषको प्रस्तावलाई रद्दीको टोकरीमा हालेपछि रिपब्लिकनहरूबीच आक्रोश पनि बढेको छ ।