निजी क्षेत्रले सरकारसँग माग्यो सुरक्षा प्रत्याभूति, जाहेरी नलिएपछि उद्योगी–व्यवसायीको मनोबल झन कमजोर

काठमाडौं । जेन जी आन्दोलनका क्रममा उद्योग, व्यवसाय र निजी सम्पत्तिमाथि भएको लुटपाट, तोडफोड र आगजनीका घटनामा संलग्नहरूलाई कारबाही प्रक्रिया अगाडि नबढाएकामा नेपाल उद्योग वाणिज्य महासंघ (एफएनसीसीआई) ले असन्तुष्टि व्यक्त गरेको छ ।

आन्दोलनले आतंकित बनाएको उद्योगी–व्यवसायीहरूलाई थप सुरक्षा प्रत्याभूति आवश्यक रहे पनि सरकारले त्यसतर्फ अग्रसरता नदेखाएको भन्दै महासंघले असन्तुष्टि व्यक्त गरेको हो ।

जेन जी आन्दोलनका क्रममा उद्योग, व्यवसाय र निजी सम्पत्तिमाथि भएको लुटपाट, तोडफोड र आगजनीका घटनामा संलग्नहरूलाई कारबाही नगरिए दण्डहीनता मौलाउने र उद्योग–व्यवसाय गर्ने वातावरण बिग्रिने भन्दै महासंघले घटनाका दोषी पत्ता लगाइ कारबाही गर्न माग गरेको छ ।

महासंघले ती घटनामा संलग्नहरूको जाहेरी नै नलिएको आफ्ना सदस्यहरूबाट गुनासो आइरहेको हुँदा यसले समाजमा दण्डहीनता मौलाउँदै जाने र व्यवसायी हतोत्साही हुने उल्लेख गर्दै यस विषयमा सरकारको गम्भीर ध्यानाकर्षण गराएको छ । महासंघले यी घटनाले निजी क्षेत्रको मनोबल कमजोर पार्ने मात्र नभई आर्थिक क्रियाकलाप मै नकारात्मक असर पुर्‍याएको जनाएको छ ।

‘घटनाका दोषीहरूमाथि जाहेरी दर्ता नलिने र कारबाहीमा उदासीनता देखिएको सदस्य व्यवसायीहरूबाट जानकारी प्राप्त भइरहेको र यस्तो अवस्था कायम रहे यसले दण्डहीनता बढ्न गइ लगानीको वातावरणलाई गम्भीर चुनौती दिने देखिन्छ । यसले रोजगारी सिर्जना, राजस्व सङ्कलन, लगानी प्रवर्द्धन र समग्र अर्थतन्त्रमा नै दीर्घकालीन असर पार्ने छ ।’ महासंघद्वारा जारी विज्ञप्तिमा उल्लेख छ ।

यस्तै महासंघले निजी क्षेत्रको सुरक्षाको प्रत्याभूतिका लागि केन्द्र र जिल्लास्तरीय सुरक्षा समितिहरूमा महासंघको प्रतिनिधित्व सुनिश्चित गर्न सम्बन्धित जिल्ला नगर उद्योग वाणिज्य संघका अध्यक्ष एवम् प्रतिनिधिको सहभागिताका लागि पनि आग्रह गरेको छ । यसबारे औपचारिक आग्रह गर्दैै महासंघले गृह मन्त्रालयमा पत्राचार समेत गरिसकेको जनाएको छ ।

नेपाल उद्योग महासंघको कार्यालय, टेकू, काठमाडौं ।

सबै तहमा सरकार निजी क्षेत्र समन्वय र मुख्यगरी जिल्लास्तरीय सुरक्षा योजना, जोखिम मूल्याङ्कन र आकस्मिक निर्णय प्रक्रियामा पनि व्यावसायिक समुदाय प्रत्यक्ष सहभागिता सुनिश्चित गर्न महासंघले समितिमा आफ्नो र सदस्य संघहरूको सहभागिताका लागि आग्रह गरेको हो ।

हिजो आइतबार महासंघका पदाधिकारी, स्थायी समिति तथा समिति/फोरमका सभापतिहरू सम्मिलित छलफलमा महासंघका कार्यबाहक अध्यक्ष अञ्जन श्रेष्ठले शान्ति सुरक्षा नभइ स्थायित्व नहुने, स्थायित्व नभइ उद्यम व्यवसाय संचालन हुन नसक्ने र उद्यम व्यवसाय सञ्चालन नहुँदा अर्थतन्त्रमै गम्भीर समस्या उत्पन्न हुने हुँदा व्यवसायीको शान्ति सुरक्षा अपरिहार्य शर्त भएको बताएका छन् ।

उनले दण्डहीनता अन्त्य गरी भविष्यमा पनि उद्यम व्यवसायीमाथि आक्रमण नहुने सुनिश्चितता गरिनुपर्ने बताए । समाजमा थप अन्यौल र अनिश्चितताको वातावरण बन्न नदिन र दण्डहीनताको अन्तका लागि दोषीमाथि छानबिन गरी कारबाही गर्नुपर्नेमा उनले जोड दिएका छन् ।

महासंघका निवर्तमान अध्यक्ष शेखर गोल्छाले देशको आर्थिक गतिविधिलाई दिगो रूपमा अगाडि बढाउन, लगानीको वातावरण विश्वसनीय बनाउन तथा निजी क्षेत्र आत्मविश्वासपूर्वक क्रियाशील रहन सक्ने अवस्था सिर्जना गर्न निजी क्षेत्रले सरकारको सक्रियता अपेक्षा गरेको बताए । अहिलेको अवस्थामा शान्ति सुरक्षा कायम गरी स्थायित्वतर्फ लैजान र उद्योगी व्यवसायीहरूको मनोबल उठाउनेतर्फ सरकारको ध्यान जान आवश्यक रहेको उनको भनाइ थियो ।

छलफलका क्रममा देशको अर्थतन्त्र र रोजगारीमा महत्वपूर्ण हिस्सा राख्ने निजी क्षेत्रमाथिको आक्रमणले उद्यमी व्यवसायी निरुत्साहित भएको भन्दै यस अवस्थामा उद्यमी व्यवसायीले निर्वाध रूपमा काम गर्न पाउने वातावरण सुनिश्चित गर्न सम्पूर्ण सम्बन्धित सबै सरोकारवालाहरूको ध्यानाकर्षण गराइएको थियो ।

छलफलमा महासंघमा उपाध्यक्षद्वय हेमराज ढकाल, ज्योत्सना श्रेष्ठ, कोषाध्यक्ष भरतराज आचार्य सहित स्थायी समिति तथा समिति/फोरमका सभापतिहरू सहभागी थिए ।