विदेशी मोबाइल, टिभी र गाडी बेचेर देश धनी बन्न सक्दैन स्वदेशी उत्पादन निर्यात गर्नुपर्छः ज्ञानेन्द्र शाही

काठमाडौं । राष्ट्रिय प्रजातन्त्र पार्टी (राप्रपा) का नेता एवम् प्रतिनिधि सभाका सांसद ज्ञानेन्द्र शाहीले सरकार विदेशी वस्तु आयातमा केन्द्रित भएको तर स्वदेशी उत्पादनमा ध्यान नदिइरहेको आरोप लगाएका छन् । संसद्मा आइतबारदेखि जारी आगामी आर्थिक वर्ष २०८०र८१ को विनियोजन विधेयकको सिद्धान्त र प्राथमिकतामाथि आफ्नो विचार राख्दै सांसद शाहीले विदेशी वस्तुको व्यापार गरेर देश संवृद्ध हुन नसक्ने तर्क गरे ।

‘विदेशी मोबाइल, टिभी, घडी र गाडी बेचेर देश धनी बन्न सक्दैन । यहाँको उत्पादन बढाएर निर्यात गर्ने पहुँचमा नेपाल पुर्‍याउनुपर्छ । तर, हामी स्वदेशी जडिबुटी, काठ, फर्निचर, खनिज, मदिरा केही पनि निर्यात गर्न नपाउने गरी ऐन बनाइरहेका छौँ । यस्तो स्थितिमा हामीले कसरी संवृद्धि हासिल गर्ने? सांसद शाहीले प्रश्न गरे ।

सोही अवसरमा सांसद शाहीले ३४ वर्षे संसदीय व्यवस्थामा मुलुकले धेरै विज्ञ अर्थमन्त्री पाएको तर देशको वास्तविक अर्थतन्त्र र स्थिति बुझेको मन्त्री नपाएको बताए ।