गरिमा विकास बैंकलाई ‘कर्पोरेट डेभलपमेन्ट अफ दि इयर’ अवार्ड

काठमाडौं । कर्पोरेट मिडिया ग्रुपले गरिमा विकास बैंकलाई ‘कर्पोरेट डेभलपमेन्ट बैंक अफ दि इयर, २०२६’ अवार्ड प्रदान गरेको छ ।

१८औँ संस्करणको ‘कर्पोरेट बिजनेश समिट एण्ड अवार्ड, २०२६’ अन्तर्गत बैंकलाई सो अवार्ड प्रदान गरिएको हो ।

ईश्वर लाल प्रतिष्ठानको सहकार्यमा कर्पोरेट मिडिया ग्रुपले बिहीबार काठमाडौंस्थित होटेल र्‍याडिसनमा आयोजना गरेको विशेष समारोहमार्फत प्रतिनिधसभा राज्य व्यवस्था तथा सुशासन समितिका सभापति हरि ढकालले बैंकका प्रमुख कार्यकारी अधिकृत (सीईओ) माधव प्रसाद उपाध्यायलाई सो अवार्ड प्रदान गरे ।

गरिमा विकास बैंक लिमिटेड ‘बैंक जनतामा जानुपर्छ’ भन्ने मूल नाराका साथ स्याङ्जाको वालिङबाट यात्रा सुरू गरेको नेपालको एक अग्रणी राष्ट्रियस्तरको विकास बैंक हो । हाल लाजिम्पाटमा केन्द्रीय कार्यालय रहेको यस बैंकले १२६ शाखा र ५१ एटीएममार्फत देशैभर वित्तीय पहुँच पुर्‍याएको छ ।

सुशासन, पारदर्शिता र डिजिटल बैंकिङलाई प्राथमिकता दिँदै यसले लाखौँ ग्राहकलाई आधुनिक एवम् गुणस्तरीय सेवा प्रदान गर्दै आएको छ । वित्तीय समावेशीकरण र संस्थागत उत्कृष्टतामा पुर्‍याएको यही योगदानको कदरस्वरूप बैंकलाई यो अवार्ड प्रदान गरिएको कर्पोरेट मिडिया ग्रुपका अध्यक्ष उज्वल जंग शाहले जानकारी दिए ।

कार्यक्रममा ‘कर्पोरेट एक्सिलेन्स’, ‘बैंकिङ, इन्स्योरेन्स एण्ड फाइनान्स’, ‘कर्पोरेट इन्डष्ट्री लिडरसिप’, ‘कर्पोरेट बिजनेश लिडरसिप’ र ‘लाइफटाइम एचिभमेन्ट’ सहित पाँचवटा विधामा कूल २९ वटा अवार्ड प्रदान गरिएको अध्यक्ष शाहले जानकारी दिए । नेपालको निजी क्षेत्र, बैंकिङ, बीमा, उद्योग, स्वास्थ्य, ऊर्जा तथा उद्यमशीलता क्षेत्रमा उल्लेखनीय योगदान पुर्‍याउने व्यक्ति तथा संस्थाहरूलाई सम्मान गर्ने उद्देश्यले विगत १८ वर्षदेखि ‘कर्पोरेट बिजनेश अवार्ड’ आयोजना गर्दै आएको उनको भनाइ छ ।

कार्यक्रममा अवार्ड वितरणसँगै देशको वर्तमान आर्थिक अवस्था, लगानीको वातावरण, निजी क्षेत्रले भोगिरहेका चुनौती तथा आर्थिक पुनरुत्थानका सम्भावनाबारे पनि छलफल गरिएको थियो । यस्तै, अर्थतन्त्रलाई चलायमान बनाउन निजी क्षेत्रको भूमिका, लगानी विस्तार, रोजगारी सिर्जना तथा आर्थिक सुधारका विषयमा समेत छलफल गरिएको थियो ।

कार्यक्रममा प्रतिनिधिसभाअन्तर्गत राज्य व्यवस्था तथा सुशासन समितिका सभापति हरि ढकाल, सङ्घीय सांसद, अर्थशास्त्री, उद्योगी–व्यवसायी तथा विभिन्न क्षेत्रका सरोकारवालाको सहभागिता रहेको थियो । साथै, देशभरका उद्योगी–व्यवसायी, बैंक तथा वित्तीय संस्था, बीमा कम्पनी, स्वास्थ्य संस्था, ऊर्जा क्षेत्र तथा अन्य व्यावसायिक क्षेत्रका प्रतिनिधिहरूको उल्लेख्य उपस्थिति रहेको थियो ।

यो पनि पढ्नुहोस्–