झापाका दुर्गा प्रसाई राजतन्त्रको पक्षमा काठमाडौंमा प्रदर्शन गर्दै, पूर्वराजा शाह पुगे झापा

काठमाडौं । पूर्वराजा ज्ञानेन्द्र शाहले झापामा आज पृथ्विनारायण शाहको शालिक अनावरण गर्दै छन् । त्यसका लागि शाह शुक्रबार अपराह्न झापा पुगेका छन् ।

झापाका व्यवसायी दुर्गा प्रसाईंले काठमाडौंमा बिहीबारबाट राजतन्त्रको पक्षमा प्रदर्शन गरे । पूर्वराजा भने झापा पुगेका हुन् । पूर्वराजाको झापा भ्रमणलाई सफल बनाउन राष्ट्रिय प्रजातन्त्र पार्टीले तयारी थालेको छ । त्यसका लागि राप्रपा अध्यक्ष राजेन्द्र लिङ्देन केही दिनयता झापामै छन् ।

झापामा पूर्वराजालाई राप्रपाले मोटरसाइकल र्‍यालीमार्फत बिर्तामोड पुर्‍याउने भएको छ । शनिबार दिउँसो १२ बजे मेचीनगरबाट र्‍याली प्रारम्भ हुने र १ बजे इकम कलेजमा शालिक अनावरण हुने कार्यक्रम राखिएको राप्रपाले जनाएको छ ।

पूर्वराजा नागरिकहरुको स्वागत अभिनन्दन ग्रहण गर्दै इकम क्याम्पसमा पुग्ने छन् । त्यहाँ रहेको पृथ्वीनारायण शाहको शालिक पूर्वराजाले अनावरण गर्ने कार्यक्रम छ ।