पछिल्ला समयमा सबै अस्पतालको सेवामा सुधार आएको छ : स्वास्थ्य मन्त्री पौडेल

काठमाडौं । पछिल्ला समयमा अस्पतालहरूले दिने सेवामा सुधार आएको स्वास्थ्य तथा जनसंख्या मन्त्री प्रदिप पौडेलले बताएका छन् ।

स्वास्थ्य सेवा दिवसका अवसरमा बिहीबार मन्त्रालयमा आयोजित कार्यक्रममा बोल्दै उनले यस्तो दावी गरेका हुन् ।

‘स्वास्थ्य सेवा प्रदान गर्ने सन्दर्भमा पछिल्लो समय हरेक अस्पतालमा केही न केही बढेको छ’ उनले भने ‘जुनसुकै अस्पतालमा पनि , म त्यो दावाका साथ भन्न सक्छु।’

तर सेवा पूर्णतातर्फ उन्मुख हुनेगरी बढाउन नसकिएको भन्दै उनले कम स्रोत साधनका बाबजुद पनि सेवाको गुणस्तर बढाउनुपर्ने, सेवा विस्तार गर्नुपर्ने चुनौती रहेको बताएका छन् ।

अहिलेको चुनौती भनेको स्वास्थ्य सेवालाई प्रभावकारी र व्यवस्थित बनाउनु रहेको उनको भनाई छ ।

स्वास्थ्य सेवा ऐनलाई निजामती ऐनबाट छुट्याउनुपर्छ भन्ने कुराको बहस गर्न अब जरुरी नरहेको मन्त्री पौडेलले बताए । स्वास्थ्य सेवा ऐन छुट्टै ल्याउने निर्णय गरी ड्राफ्टसमेत अन्तिम चरणमा रहेको उनले जानकारी दिए ।

‘चिकित्सक, स्वास्थ्यकर्मीका स्तरवृद्धिका कुरा, सरुवा नेतृत्व प्रदान गर्न जस्ता विषय ऐनमै स्पष्ट पार्नुपर्ने र त्यो गरिने उनको भनाइ छ ।

नर्सले डाक्टरले दबाबमा काम गर्न नसक्ने भएकाले दबाबमुक्त भएर काम गर्ने वातावरणमा बनाउनुपर्ने उनले जोड दिए ।

स्वास्थ्यका अन्य ऐन पनि छिट्टै ल्याउने तयारी भइरहेको उनले जानकारी दिए ।