हिमालय रोडिज सिजन ७ का विजेता अनिश तामाङलाई यामाहा एफजेड भी हस्तान्तरण

काठमाडौं । नेपालकै लोकप्रिय साहसिक रियालिटी शो हिमालय रोडिज को सातौँ सिजन सफलतापूर्वक सम्पन्न भएको छ।

१४ पुष २०८२ मा ग्रान्ड फिनाले प्रसारण भएसँगै सिजन औपचारिक रूपमा टुंगिएको हो भने आज आयोजित पुरस्कार हस्तान्तरण समारोहमार्फत विजेतालाई सम्मान गरिएको छ। यस सिजनले देशभरका युवाहरूको उल्लेखनीय ध्यान आकर्षित गर्दै नेपाली रियालिटी टेलिभिजनमा नयाँ मापदण्ड स्थापित गरेको आयोजकले जनाएको छ।

हिमालय रोडिज सिजन ७ का विजेता झापाका २६ वर्षीय अनिश तामाङ घोषित भएका छन् । पेशाले नेपाली सेनामा कार्यरत अनिशले सिजनभर देखाएको शारीरिक क्षमता, मानसिक दृढता, अनुशासन र अठोटका कारण आफूलाई सबैभन्दा सबल प्रतिस्पर्धीका रूपमा स्थापित गर्न सफल भए। शोका क्रममा प्रस्तुत साहस, धैर्य र निरन्तर उत्कृष्ट प्रदर्शनले उनले दर्शक, ग्याङ लिडर तथा निर्णायकहरूको व्यापक प्रशंसा बटुले।

पुरस्कार हस्तान्तरण समारोहमा टाइटल स्पोन्सर यामाहाले अनिश तामाङलाई पर्फर्मेन्स, पावर र राइडिङ अनुभवको प्रतीक यामाहा एफजेड भी मोटरसाइकल प्रदान गरेको छ। यामाहा नेपालका सीईओ तथा कार्यकारी निर्देशक दीपक कुमार अग्रवालले औपचारिक रूपमा मोटरसाइकल हस्तान्तरण गर्नुभएको थियो। साथै, कार्यक्रमको प्रसारक हिमालय टिभीले अनिशको समर्पण र मेहनतको कदर गर्दै १० लाख रुपैयाँ नगद पुरस्कारसमेत प्रदान गरेको छ ।

यामाहा प्रेसेंट्स हिमालय रोडिज सिजन ७: हेल्ल ओर हेएवेन सेप्टेम्बर १, २०२५ देखि प्रसारण सुरु भएको थियो, जसमा १८ एपिसोड समावेश थिए। पोखरामा छायांकन गरिएका साहसिक यात्रा, शोको इतिहासमै पहिलो महिला फाइनलिस्टको सहभागिता र चर्चित ग्याङ लिडरहरूको उपस्थितिले सिजनलाई विशेष बनाएको थियो । सिजन ७ को समापनसँगै हिमालय रोडिजले युवावस्था, साहस र दृढताको उत्सव मनाउँदै नेपालकै प्रभावशाली साहसिक रियालिटी शोको रूपमा आफ्नो पहिचान पुन: सुदृढ गरेको छ ।