आईसीएफसी फाइनान्सलाई ‘कर्पोरेट फाइनान्स अफ दि इयर’ अवार्ड

काठमाडौं । कर्पोरेट मिडिया ग्रुपले आईसीएफसी फाइनान्स लिमिटेडलाई ‘कर्पोरेट फाइनान्स अफ दि इयर, २०२६’ अवार्ड प्रदान गरेको छ ।

१८औँ संस्करणको ‘कर्पोरेट बिजनेश समिट एण्ड अवार्ड, २०२६’ अन्तर्गत फाइनान्सलाई सो अवार्ड प्रदान गरिएको हो ।

ईश्वर लाल प्रतिष्ठानको सहकार्यमा कर्पोरेट मिडिया ग्रुपले बिहीबार काठमाडौंस्थित होटेल र्‍याडिसनमा आयोजना गरेको विशेष समारोहमार्फत प्रतिनिधसभा राज्य व्यवस्था तथा सुशासन समितिका सभापति हरि ढकालले फाइनान्सका प्रमुख कार्यकारी अधिकृत (सीईओ) सुनिल पन्तलाई सो अवार्ड प्रदान गरे ।

आईसीएफसी फाइनान्स लिमिटेड दुई दशकदेखि सुरक्षित र भरपर्दो सेवा प्रदान गर्दै आएको राष्ट्रिय स्तरको ‘ग’ वर्गको वित्तीय संस्था हो । काठमाडौँको भाटभटेनीमा केन्द्रीय कार्यालय रहेको संस्थाले अत्याधुनिक, नवीन बैङ्किङ प्रविधिमार्फत १९ शाखाहरूबाट सेवा दिइरहेको छ ।

सुशासन, पारदर्शिता र उत्कृष्ट जनशक्तिको बलमा यसले वित्तीय पहुँच विस्तार र आर्थिक समावेशीकरणमा महत्त्वपूर्ण भूमिका खेलेको छ । संस्थाको यही उत्कृष्ट कार्यप्रणाली, वित्तीय सुशासन र व्यावसायिक योगदानको कदरस्वरूप यो अवार्ड प्रदान गरिएको कर्पोरेट मिडिया ग्रुपमा अध्यक्ष उज्वल जंग शाहले जानकारी दिए ।

कार्यक्रममा ‘कर्पोरेट एक्सिलेन्स’, ‘बैंकिङ, इन्स्योरेन्स एण्ड फाइनान्स’, ‘कर्पोरेट इन्डष्ट्री लिडरसिप’, ‘कर्पोरेट बिजनेश लिडरसिप’ र ‘लाइफटाइम एचिभमेन्ट’ सहित पाँचवटा विधामा कूल २९ वटा अवार्ड प्रदान गरिएको अध्यक्ष शाहले जानकारी दिए । नेपालको निजी क्षेत्र, बैंकिङ, बीमा, उद्योग, स्वास्थ्य, ऊर्जा तथा उद्यमशीलता क्षेत्रमा उल्लेखनीय योगदान पुर्‍याउने व्यक्ति तथा संस्थाहरूलाई सम्मान गर्ने उद्देश्यले विगत १८ वर्षदेखि ‘कर्पोरेट बिजनेश अवार्ड’ आयोजना गर्दै आएको उनको भनाइ छ ।

कार्यक्रममा अवार्ड वितरणसँगै देशको वर्तमान आर्थिक अवस्था, लगानीको वातावरण, निजी क्षेत्रले भोगिरहेका चुनौती तथा आर्थिक पुनरुत्थानका सम्भावनाबारे पनि छलफल गरिएको थियो । यस्तै, अर्थतन्त्रलाई चलायमान बनाउन निजी क्षेत्रको भूमिका, लगानी विस्तार, रोजगारी सिर्जना तथा आर्थिक सुधारका विषयमा समेत छलफल गरिएको थियो ।

कार्यक्रममा प्रतिनिधिसभाअन्तर्गत राज्य व्यवस्था तथा सुशासन समितिका सभापति हरि ढकाल, सङ्घीय सांसद, अर्थशास्त्री, उद्योगी–व्यवसायी तथा विभिन्न क्षेत्रका सरोकारवालाको सहभागिता रहेको थियो । साथै, देशभरका उद्योगी–व्यवसायी, बैंक तथा वित्तीय संस्था, बीमा कम्पनी, स्वास्थ्य संस्था, ऊर्जा क्षेत्र तथा अन्य व्यावसायिक क्षेत्रका प्रतिनिधिहरूको उल्लेख्य उपस्थिति रहेको थियो ।

यो पनि पढ्नुहोस्–