आईसीएफसी फाइनान्सलाई ‘फाइनान्स अफ द इयर अवार्ड’ (भिडिओ)

काठमाडाैं । नेपाल राष्ट्र बैंकबाट इजाजतप्राप्त राष्ट्रियस्तरको वित्तीय संस्था आईसीएफसी फाइनान्स लिमिटेडले ‘फाइनान्स अफ द इयर अवार्ड, २०२५’ प्राप्त गरेको छ ।

कर्पोरेट म्यागजिनले फाइनान्सलाई सो अवार्ड प्रदान गरेको हो ।

बिहीबार काठमाडौंको लाजिम्पाटस्थित र्‍याडिसन होटेलमा आयोजित ‘कर्पोरेट बिजनेश अवार्ड, २०२५’ समारोहमा फाइनान्सलाई सो अवार्ड प्रदान गरिएको कर्पोरेट म्यागजिनका संस्थापक सम्पादक उज्वलजंग शाहले जानकारी दिनुभयो ।

कार्यक्रमका प्रमुख अतिथि रक्षामन्त्री मानवीर राई, अवार्ड छनोट समिति संयोजक तथा नेपाल उद्योग वाणिज्य महासङ्घ (एफएनसीसीआई) की पूर्वअध्यक्ष भवानी राणा, कर्पोरेट मिडियाकी उपाध्यक्ष सुष्मा महरालगायतले फाइनान्सका प्रमुख कार्यकारी अधिकृत (सीईओ) सुनील पन्तलाई अवार्ड प्रदान गर्नुभएको थियो ।

आईसीएफसी फाइनान्स र सुनील पन्तबारे

आईसीएफसी फाइनान्स लिमिटेड नेपाल राष्ट्र बैंकबाट इजाजतप्राप्त राष्ट्रियस्तरको वित्तीय संस्था हो । साना तथा मझौला उद्यमीका आवश्यकताहरू पूरा गर्ने मुख्य उद्देश्य राखेर वि.स. २०६१ असार ३१ गते यसको स्थापना भएको हो । काठमाडौंको भाटभटेनीमा मुख्य कार्यालय रहेको आईसीएफसी फाइनान्स पछिल्लो समय निकै सशक्त वित्तीय संस्थाका रूपमा परिचित छ । अत्याधुनिक प्रविधिको प्रयोग, अन्तर्राष्ट्रिय राम्रा अभ्यासहरूमार्फत नवीन र परिष्कृत वित्तीय उपकरणको प्रयोगले आईसीएफसीमा आम ग्राहकहरूको आकर्षण व्यापक छ ।

आईसीएफसी फाइनान्सका प्रमुख कार्यकारी अधिकृत (सीईओ) सुनील पन्त हुनुहुन्छ । वि.स. २०२९ असार १५ गते पिता केदारनाथ पन्त र माता भवानी पन्तको कोखबाट काठमाडौंमा जन्मिनुभएका सुनील पन्तको पुख्र्यौली घर गोरखा हो । परिवारको अघिल्लो पुस्ता नै गोरखाबाट काठमाडौंमा बसाइँसराइ गरेका कारण उहाँको जन्म, शिक्षादीक्षा र कर्मथलो सबै काठमाडौंमै भयो ।

काठमाडौंको बनस्थलीस्थित सिद्धार्थ बनस्थली स्कुलबाट विद्यालय शिक्षा लिनुभएका उहाँले त्रिभुवन विश्वविद्यालयबाट एमबीएसम्मको अध्ययन गर्नुभएको छ । हाल नेपाल वित्तीय संस्था (एनएफआईए)का अध्यक्षसमेत रहनुभएका उहाँले नेपालको वित्तीय क्षेत्रमा लामो अनुभव हासिल गर्नाका साथै उत्कृष्ट करिअरसमेत निर्माण गर्न सफल हुनुभएको छ ।

एनएमबी बैंकबाट वित्तीय सेवाको यात्रा सुरू गर्नुभएका सुनील पन्तले त्यहाँ पाँच वर्षे कार्यकाल बिताएर माछापुच्छ्रे बैंकमा जोडिनुभयो । व्यवस्थापन तहमा रहेर माछापुच्छ्रे बैंकमा पाँच वर्ष कार्य अनुभव हासिल गर्नुभएका उहाँ पछिल्लो समय दोस्रो कार्यकालका लागि आईसीएफसीको सीईओ रहनुभएको छ । त्यसअघि उहाँले फर्स्ट माइक्रोफाइनान्स डेभलपमेन्ट बैंक र नेपाल क्लियरिङ हाउसको सञ्चालक पदमा रही महत्वपूर्ण भूमिका निर्वाह गर्नुभएको थियो ।

लामो समयदेखि वित्तीय क्षेत्रमा रहनुभएका उहाँले बैंक तथा वित्तीय संस्थाहरूको विस्तार, नेपालको वित्तीय प्रणालीको सुधार र दिगो विकासमा योगदान गर्नुहुँदै बैंक तथा वित्तीय संस्थाहरूको नाफा वृद्धि, सेवा विस्तार तथा डिजिटलाइजेशन प्रवर्द्धनमा महत्वपूर्ण योगदान गर्नुभएको छ । उहाँ नेपालको बैंकिङ तथा वित्तीय क्षेत्रका एक अनुभवी र कुशल नेतृत्वकर्ता हुनुहुन्छ । जसले संस्थागत विकास, रणनीतिक योजना, वित्तीय व्यवस्थापन, र जोखिम व्यवस्थापनमा विशेष योगदान पुर्‍याउनुभएको छ ।

हेर्नुहाेस् भिडिओ–