आईजे ग्रुपका अध्यक्ष श्रेष्ठले पाउनुभयो ‘कर्पोरेट लाइफटाइम एचिभमेन्ट अवार्ड’, को हुनुहुन्छ उहाँ ?

आफ्नो बुबाको विरासत पछ्याउँदै नेपाल उद्योग वाणिज्य महासंघको अध्यक्ष बन्नुभएका उहाँले उद्योगी व्यवसायीलाई समाज र ब्युरोक्रेसीले हेर्ने दृष्टिकोण बदल्नमा ठूलो योगदान पुर्‍याउनुभएको छ

काठमाडौं । प्रतिष्ठित औद्योगिक समूह ‘आईजे ग्रुप’का अध्यक्ष रविभक्त श्रेष्ठ ‘कर्पोरेट लाइफटाइम एचिभमेन्ट अवार्ड’ बाट सम्मानित हुनुभएको छ । कर्पोरेट मिडिया ग्रुपले आफ्नो १७औँ वार्षिकोत्सवको अवसरमा उहाँलाई सो अवार्ड प्रदान गरेको हो ।

आर्थिक तथा सामाजिक संघ–संस्थाहरूको नेतृत्वमा रहनुभई मुलुकको अर्थतन्त्र र समाजसेवामा पुर्‍याउनुभएको विशिष्ट योदानबापत श्रेष्ठलाई यो अवार्ड प्रदान गरिएको कर्पोरेट मिडिया ग्रुपका अध्यक्ष उज्वलजंग शाहले जानकारी दिनुभयो ।

उहाँका अनुसार बिहीबार काठमाडौंको र्‍याडिसन होटेलमा १७औँ संस्करणको ‘कर्पोरेट बिजनेश अवार्ड, २०८१’ आयोजना गरी श्रेष्ठलाई प्रमुख अतिथि रक्षामन्त्री मानवीर राई, कर्पोरेट मिडियाका अध्यक्ष उज्वलजंग शाह, उपाध्यक्ष सुष्मा महरा, नेपाल उद्योग वाणिज्य महासंघकी पूर्व अध्यक्ष तथा अवार्ड छनोट समितिकी संयोजक भवानी राणा, सदस्यहरू ईश्वर लाल फाउण्डेशनका अध्यक्ष प्रदीप लाल श्रेष्ठ, राष्ट्रिय उपभोक्ता मञ्चका अध्यक्ष प्रेमलाल महर्जन, आईआईएफटीका अध्यक्ष फुपु तेञ्जिङ शेर्पालगायतले दोसल्ला ओढाई अवार्ड र प्रमाणपत्र प्रदान गरी सम्मान गर्नुभयो ।

कर्पोरेट मिडियाले १७औँ संस्करणमा उद्योग, व्यापार, स्वास्थ्य, पर्यटन, उड्डयन, बैंक, फाइनान्स, इन्स्योरेन्स, सूचना प्रविधि र नवउद्यमीलगायत विभिन्न क्षेत्र समावेश गरी ११ वटा विधामा २४ वटा अवार्ड प्रदान गरेको छ ।

को हुनुहुन्छ रविभक्त श्रेष्ठ ?

वि.स. २०११ जेठ ६ गते (तदनुसार सन् १९५४ मे १९) मा पिता इन्द्रभक्त श्रेष्ठ र माता जवाहरदेवी श्रेष्ठका सातमध्ये पाँचौं सन्तानका रूपमा काठमाडौंमा जन्मिुनभएका रविभक्त श्रेष्ठ प्रतिष्ठित औद्योगिक समूह ‘आईजे ग्रुप’का अध्यक्ष हुनुहुन्छ । जेपी हाइस्कुल हुँदै लेबोरेटरी स्कुलबाट एसएलसी उत्तीर्ण गर्नुभएका उहाँले त्रिचन्द्र कलेजबाट ‘बिजनेश एड्मिनिस्ट्रेशन’ र अमेरिकाको न्यूयोर्क बिजनेश स्कुलबाट व्यवस्थापनमा स्नातकसम्मको अध्ययन गर्नुभएको छ ।

अत्यन्तै मिलनसार, मेहनती र दृढनिश्चयी स्वभावका धनी रविभक्त श्रेष्ठ आफ्नो योग्यता, क्षमता र लगनशीलतामा अत्यन्तै विश्वास गर्नुहुन्छ । त्यही विश्वासकै कारण उहाँले आफ्नो जीवनलाई कहिल्यै पछि फर्केर हेर्नुपरेको छैन । व्यावसायिक, सामाजिक र राजनीतिक क्षेत्रमा समेत उहाँले सफलता नै सफलता हासिल गर्दै अघि बढिरहनुभएको छ ।

उहाँका जिजुहजुरबुबा, हजुरबुबा र बुबा क्रमशः व्यावसायिक र औद्योगिक पृष्ठभूमिका हुनुहुन्थ्यो । त्यसकारण रविभक्तलाई व्यवसाय वा उद्योग क्षेत्रमा प्रवेश गर्न त्यति गाह्रो भएन । तर, आजसम्मको यात्रामा अनेक कठिन आर्थिक परिस्थिति र राज्यका अव्यावहारिक नीतिहरूले सृजना गर्ने कयौँ समस्याहरूसँग आम उद्योगी तथा व्यवसायीहरूले झैँ जुध्दै आउनुभएको छ ।

पितापुर्खाले करिब एक शताब्दीअघि सराफी, कपडा र किराना पसल तथा ब्रुकबण्ड ब्राण्डको चिया आयात तथा बिक्रीबाट सुरू गर्नुभएको व्यावसायिक औद्योगिक यात्रालाई उहाँले एउटै व्यावसायिक ग्रुपभित्र एकीकृत गर्नुभइ प्रतिष्ठित व्यापारिक समूह आईजे ग्रुपको नामबाट परिचित गराउनुभएको छ । नेपालले वि.स. २०४७ सालमा उदारवादी अर्थतन्त्रको नीति लिएपछि निजी क्षेत्रले विभिन्न क्षेत्रमा प्रवेश गर्ने अवसर पायो । त्यही क्रममा उहाँका बुबा इन्द्रभक्त श्रेष्ठले अथक प्रयास गरी विश्वविख्यात बहुराष्ट्रिय कम्पनी युनिलिभरलाई नेपाल भित्र्याएर आफ्नो पारिवारिक व्यावसायिक विरासतलाई औद्योगिक यात्रातर्फ डोर्‍याउनुभयो । यसबाट इन्द्रभक्तलाई नेपालमा बहुराष्ट्रिय कम्पनी भित्र्याउने पहिलो व्यवसायीको पहिचान प्राप्त भयो । उहाँले युनिलिभरलाई नेपालमा ‘इन्ट्रोड्युस’ गराउनुभएपछि नै नेपालमा अन्य ‘मल्टिनेशनल’ कम्पनी भित्रिन सुरू गरेको हो ।

त्यही पदचाप पछ्याउने क्रममा हाल रविभक्त श्रेष्ठ नेतृत्वको आईजे ग्रुपभित्र उत्पादन, डिस्ट्रिब्युशन, हस्पिटालिटी, बैंकिङ, बीमा, रियल इस्टेट, शिक्षा, स्वास्थ्य, परामर्श सेवा तथा परियोजना विकास र अन्तर्राष्ट्रिय व्यापारससँग सम्बन्धित दर्जनौँ कम्पनीहरू समावेश छन् । मल्टिनेशनल कम्पनी युनिलिभरमा साझेदारीका साथै सोल्टी, समिट र भिभान्ता होटेल, हिमालय बैंक, युनाइटेड अजोड इन्स्योरेन्स, नेशनल आइसक्रीम, आईजे पायोनियर हाइस्कुल जस्ता कहलिएका व्यापारिक प्रतिष्ठानहरूमा आईजे ग्रुपको लगानी छ । यो ग्रुपको छातामुनि रहेका एसोसिएट/सब्सिडरी कम्पनीहरूमा एक हजारभन्दा धेरैले प्रत्यक्ष रोजगारी पाइरहनुभएको छ ।

पछिल्लो समय आईजे ग्रुपले हस्पिटालिटी क्षेत्रमा व्यापार वृद्धि गरिरहेको छ । सोल्टी ग्रुप, समिट र भिभान्ता होटेलमा लगानी गरी पर्यटन प्रवद्र्धनलाई सहयोग पुर्‍याउँदै आएको छ । सोल्टी होटेल लिमिटेडले जर्मनीको फ्र्याङ्कफर्टमा दुईवटा होटेलको व्यवस्थापनको जिम्मा लिएर अन्तर्राष्ट्रिय रूपमा नेपालको व्यावसायिक पहिचान स्थापित गर्न सफल भएको छ । यसरी ऐतिहासिक रूपमा नेपाली ब्राण्डको होटेल युरोपको सहरमा स्थापना हुनु नेपालका लागि ठूलो ‘एचिभमेन्ट’ हो ।

त्यसैगरी, इन्द्र जवाहर च्यारिटेबल ट्रष्टमार्फत त्रिभुवन विश्वविद्यालय शिक्षण अस्पताल (टिचिङ)को बालरोग विभागसँग सहकार्य गरी एक करोड २५ लाख रुपैयाँको अक्षयकोष स्थापना गरी त्यसमार्फत असहाय बालबालिकालाई निःशुल्क उपचार सेवा उपलब्ध गराइएको छ । यस्तै, त्रिभुवन विश्वविद्यालय स्कुल अफ म्यानेजमेन्टमा एक करोड रुपैयाँको अक्षयकोष स्थापना गरी हरेक वर्ष एमबीए अध्ययन गर्ने दुई जना विद्यार्थीलाई ‘फ्री स्कलरशिप’ प्रदान गरिँदै आएको छ । यसैगरी, हरेक वर्ष देशभरबाट एमबीए टपर विद्यार्थीलाई त्रिभुवन विश्वविद्यालयको वार्षिक दीक्षान्त समारोहमा ‘इन्द्रभक्त गोल्ड मेडल’ प्रदान गर्ने गरिएको छ ।

आफ्नो बुबाको विरासत पछ्याउँदै नेपाल उद्योग वाणिज्य महासंघको अध्यक्ष बन्नुभएका उहाँले उद्योगी व्यवसायीलाई समाज र ब्युरोक्रेसीले हेर्ने दृष्टिकोण बदल्नमा ठूलो योगदान पुर्‍याउनुभएको छ । उहाँले महासंघभित्र ‘कर्पोरेट इथिक्स फोरम’ तथा ‘बिजनेश कोड अफ कन्डक्ट’ बनाएर ‘मोरल बिजनेश’ अगाडि बढाउन पहलकदमी गर्नुहुँदै महासंघलाई प्रतिष्ठित र गरिमामय संस्था बनाउन महत्वपूर्ण योगदान गर्नुभयो । त्यस्तै, उद्योगी व्यवसायीको समस्याका विषयमा छलफल गर्न तत्कालीन प्रधानमन्त्री शेरबहादुर देउवालगायत विभिन्न राजनीतिक दलका शीर्षस्थ नेताहरूलाई महासंघकै कार्यालयमा पनि ल्याउन उहाँ सफल हुनुभएको थियो ।

महासंघको नेतृत्वमै छँदा उहाँले तत्कालीन प्रधानमन्त्री लोकेन्द्रबहादुर चन्द नेतृत्वको क्याबिनेटमा पर्यटन सहायकमन्त्री बन्ने अवसर प्राप्त गर्नुभयो । त्यसबेला उहाँले काठमाडौंबाट मलेसियाको राजधानी क्वालालम्पुरमा हवाई उडानको सुरूवात गर्नुभयो भने हालको नेपाल वायु सेवा निगमलाई पब्लिक–प्राइभेट–पार्टनरशिप (पीपीपी) मोडलमा लैजाने प्रक्रिया आरम्भ गर्नुभएको थियो । तर, सात महिनामै तत्कालीन प्रधानमन्त्री लोकेन्द्रबहादुर चन्द नेतृत्वको सरकार परिवर्तन भएपछि उहाँको त्यो कामले पूर्णता पाउन सकेन ।

उहाँ हाल प्रधानमन्त्रीको नेतृत्वमा रहेको उद्योग तथा व्यापार परिषद्को सदस्य हुनुहुन्छ । नेपाल कोरिया चेम्बर अफ कमर्सका संस्थापक अध्यक्ष रहनुभएका रविभक्त श्रेष्ठ नेपाल फुटबल एसोसिएशन (एन्फा) र क्रिकेट एसोसिएशन अफ नेपाल (क्यान)का पूर्वसल्लाहकार हुनुहन्छ । त्यस्तै, आफ्नो माता र पिताको नामबाट स्थापना गरिएको ‘इन्द्र जवाहर च्यारिटेबल ट्रष्ट’ तथा ‘मल्पी इन्टरनेशनल कलेज’को नेतृत्व पनि उहाँले सम्हाल्दै आउनुभएको छ ।

लगानी प्रवर्द्धनका लागि सरकारको प्रतिनिधिमण्डल सदस्यसमेत हुनुभएर उहाँले विश्वका विभिन्न देशहरूको भ्रमण गरिसक्नुभएको छ । प्रसिद्ध प्रबल गोरखा दक्षिण बाहु (दोस्रो), गोरखा दक्षिण बाहु (तेस्रो)बाट विभूषित उहाँले ‘नाइट अफिसर अफ द अर्डर अफ मेरिट अफ द इटाली अवार्ड’ र कोरिया सरकारबाट प्रशंसापत्रलगायत अनगिन्ती मान–सम्मान प्राप्त गर्नुभएको छ ।

यसरी आर्थिक तथा सामाजिक संघ–संस्थाहरूको नेतृत्वमा रहनुभई श्रेष्ठले विभिन्न गतिविधिमार्फत मुलुकको अर्थतन्त्र र समाजसेवामा महत्वपूर्ण योगदान पुर्‍याउनुभएको छ ।