‘देशको परिवर्तनमा साङ्गीतिक क्षेत्रको महत्वपूर्ण योगदान’ : मन्त्री गहतराज

काठमाडौँ । युवा तथा खेलकुद मन्त्री महेश्वरजङ्ग गहतराजले देशको परिवर्तनमा साङ्गीतिक क्षेत्रको महत्वपूर्ण योगदान रहेको बताएका छन् । 

सङ्गीतकार सङ्घ नेपालले विजया दशमीको उपलक्ष्यमा शुक्रबार आयोजना गरेको ‘श्रष्टा सम्मान तथा शुभकामना आदानप्रदान कार्यक्रम’मा उनले खेलाडी र कलाकारले नै देशलाई चिनाउने भएपनि उनीहरूको उचित सम्मान गर्न नसकिएको बताए । सर्जकले सिर्जना गर्ने भएकाले उनीहरूको दक्षता र सोही क्षेत्रको विज्ञताको आधारमा सम्मान हुनुपर्ने मन्त्री गहतराजको भनाइ थियो ।  

कार्यक्रममा मन्त्री गहतराजले वरिष्ठ नृत्य निर्देशक भैरवबहादुर थापा, गीतकार किरण खरेल, गायक भक्तराज आचार्य, लोकगायक कुमार बस्नेत र सङ्गीतकार शम्भुजित बाँस्कोटा, गुरूश्री सङ्गीत सम्मान चन्दन श्रेष्ठ र शिवबहुदर सुनाम स्मृति नाग रत्न सङ्गीत पुरस्कार २०७९ सङ्गीतकार अमुल कार्कीलाई प्रदान गरियो । उनीहरूलाई दोसल्ला र रू २५ हजारसहित सम्मान गरिएको हो । 

सो अवसरमा गीतकार डा. भोला रिजाल, सङ्गीतकार भुपेन्द्र रायमाझी, निर्देशक युवराज लामा, गीतकार प्रमोद ढुङ्गाना, गायक तथा निर्देशक नारायण रायमाझी, देउडा गायक नन्दकृष्ण जोशी, नृत्य निर्देशक कमल राईलगायत सम्मानित भए । कार्यक्रममा सङ्गीतकार बाँस्कोटाले सङ्गीत बोर्डको आवश्यकता औँल्याए । “स्रष्टाको सम्मान र अधिकारको लागि यो सङ्घको स्थापना गरिएको हो । चलचित्र विकास बोर्ड झैँ सङ्गीत बोर्ड भएमा हामीले पाउने अधिकारलाई नीतिगत रुपमा अगाडि बढाउन सक्छौँ,” उनले भने । 

सङ्घका अध्यक्ष चेतन सापकोटाले गीतकार, गायन समाज, उत्पादक सङ्घ, रोयल्टी सङ्कलन समाजसँग सहकार्य गरेर अगाडि बढ्ने बताए । “बौद्धिक सम्पत्तिको मौलिक हक संरक्षण र सम्मानजनक सहभागिताका लागि नीतिगतरूपमै  अगाडि बढ्ने छौँ । अब हामी झक्झकाउने गरी आवाज उठाउने छौँ,” अध्यक्ष सापकोटाले भने ।