वरिष्ठ नेता पौडेलद्वारा चुनावी सम्पर्क कार्यालय उद्घाटन

काठमाडौँ । नेपाली कांग्रेसका वरिष्ठ नेता तथा तनहुँ क्षेत्र नं १ का प्रतिनिधिसभा सदस्य उम्मेदवार रामचन्द्र पौडेलले व्यास नगरपालिका–९ मा चुनावी सम्पर्क कार्यालयको उद्घाटन गरेका छन् । 

सो अवसरमा उनले देशको भविष्य कोर्न आफूले उम्मेदवारी दिएको बताए । जनताले परिवर्तनको अनुभूति हुने गरी काम गर्न बाँकी रहेको उल्लेख गर्दै नेता पौडेलले राष्ट्रलाई सही बाटो देखाउन र सही दिशामा लैजान आफू राजनीतिमा सक्रिय रहेको बताए । गाउँमा रोजगारी र आम्दानीको अवसर गाउँगाउँमा दिलाउन आफ्नो उम्मेदवारी रहेको उनले स्पष्ट पारे । 

उनले भने, “सडक, बिजुली, पानी, सञ्चार र पूर्वाधार निर्माणमा लाग्यौँ, हामीले गाउँगाउँमा बाटो पुर्‍याऔँ, स्कुल पुर्‍याऔँ तर गाउँ रित्तिदै गएकाले रित्तिनेक्रम रोक्नुपर्छ, अहिलेसम्म गाउँबाट विचलित भएको मनलाई म गाउँमै सेवा र सुविधा पुर्‍याएर बसौँ-बसौँ बनाउन लाग्नेछु ।” 

देशमा सुशासन ल्याउनका लागि सबैको समर्थन र सहयोग प्राप्त गर्नका लागि, जनताकै सहयोगबाट यो हैसियतमा पुगेको र त्यसलाई नबिर्सिएको नेता पौडेलले बताए । “उत्साह, साथीको भरोसा प्राप्त भएको छ, सहयोग र समर्थनले शक्ति प्राप्त भएको छ”, उनले भने ।