चलचित्र ‘लभ सर्कल’मा समावेश ‘ओ मैया’ सार्वजनिक

काठमाडौं । चलचित्र ‘लभ सर्कल’मा समावेश गरिएको गीत ‘ओ मैया’ सार्वजनिक गरिएको छ । कमेडी र सस्पेन्स थ्रिलर जनरामा बनेको चलचित्रको निर्देशन बसन्त निरौलाले गरेका हुन् ।

लकडाउनको समयमा फुर्सदमा रहेका कलाकार तथा प्राविधिकहरूलाई पनि केही राहत होस् भन्ने उद्देश्यका साथ डिजिटल प्लेट फर्ममा मात्र प्रदर्शन गर्ने लक्ष्यसहित निर्माण गरिएको चलचित्र मि टिभीको प्रस्तुतिमा निर्माण भएको हो ।

चलचित्रलाई ओम प्रकाश अग्रवाल र रोशन पौडेलले निर्माण गरेका हुन् । गीतमा चलचित्रका मुख्य कलाकार नाजिर हुसेन, मुकुन भुषाल, पवित्रा आचार्य र रिस्ता बस्नेत फिचर्ड छन् । चलचित्रमा यी चार कलाकार बाहेक रवीन्द्र झा र सुमन कोइरालाको समेत अभिनय छ ।

‘ओ मैया’ बोलको गीतमा अंकित बाबुको स्वर संगीत तथा शब्द रचना रहेको छ । स्वरमा अंकित बाबुलाई विद्या तिवारीले साथ दिएकी छिन् भने शब्दमा अन्वेष थुलुङ्ग राईले साथ दिएका छन् । पवित्रा आचार्यको कोरियोग्राफी रहेको गीत रोमान्टिक फ्लेभरको बनेको छ ।

चलचित्र ‘लभ सर्कल’ मा अंकित बाबु अधिकारीको संगीत, श्रीधर पौडेलको पोस्टर फोटोग्राफी, मुख्य सहायक निर्देशक बिनय पौडेल, लेखन अभिमन्यु निरवी, कलर राजेन्द्र मोक्तान, छायाँकन दिब्य सुबेदी, कोरियोग्राफी पवित्रा आचार्य र सम्पादन शाहील खान र मिलन श्रेष्ठको रहेको छ । आगामी २९ गतेबाट चलचित्र डिशहोम सिनेमा घर च्यानल नम्बर ५५५ मा प्रदर्शनमा आउने छ ।

यससँगै सम्पूर्ण डिजिटल प्लेट फर्ममा पनि चलचित्र प्रदर्शन गरिने निर्माता ओम प्रकाश अग्रवालले जानकारी दिए । गीत ओएसआर डिजिटलको अफिसियल च्यानलबाट सार्वजनिक गरिएको हो ।