‘अघोषित युद्ध’ मा छन् भारत र पाकिस्तान, नेपालमा सम्भावित प्रभावको पूर्वतयारी खोइ ?

काठमाडौं । सांसदहरूले छिमेकी राष्ट्रहरू भारत र पाकिस्तानबीच बढिरहेको तनावले नेपाल र नेपालीलाई पर्न सक्ने प्रभावबारे सरकारको ध्यानाकर्षण गराएका छन् ।

आज शुक्रबारको प्रतिनिधिसभा बैठकमा सांसदहरूले दुई देशबीचको तनावले नेपाल र नेपालीको सुरक्षालगायत विषयमा सम्भावित जोखिमबाट बच्न अपनाउनुपर्ने सतर्कताबारे आवाज उठाएका हुन् ।

बैठकको शून्य समयमा सांसदहरू राष्ट्रिय स्वतन्त्र पार्टीका शिशिर खनाल, नेकपा (एकीकृत समाजादी) का शेरबहादुर कुँवर र राष्ट्रिय प्रजातन्त्र पार्टीकी बीना जयसवालले सरकारलाई आवश्यक पूर्वतयारी गर्न आग्रह गरेका हुन् ।

सांसद शिशिर खनालले भारत–पाकिस्तानबीच युद्धको स्थिति बने नेपालको सुरक्षा, अर्थतन्त्र र आपूर्ति शृङ्खला तथा दुई देशमा रहेका नेपालीहरूमाथि पर्न सक्ने प्रभावको आकलन गरी योजना निर्माण गर्न माग गरे ।

उनले पाकिस्तानमा अध्ययनरत ८० जना विद्यार्थीहरूले उद्धारको अनुरोध गरेकाले तुरुन्त उद्धार र सुरक्षाको पहल तथा संसद्लाई समग्र परिस्थितिको मूल्याङ्कन र नेपाल सरकारको तयारीबारे जानकारीका लागि रुलिङ गर्न माग गरे ।

सांसद शेरबहादुर कुँवरले भारतको जम्मू–कश्मीर राज्यको पहलगाममा भएको आतङ्कवादी हमलापछि दक्षिण एसियामा अशान्तिको सङ्केत देखिएको भन्दै नेपालले सतर्कता अपनाउनुपर्नेमा जोड दिए ।

सांसद बीना जयसवालले नेपाल र भारतबीच खुला सिमाना भएकाले युद्धको चपेटाबाट भाग्ने शरणार्थी, आतङ्ककारी वा विदेशी गुप्तचरहरू समातिएको खबर आइरहेको बताइन् ।

उनले सुरक्षा निकायहरूलाई सशक्त बनाई सुरक्षा चेकपोष्टहरूमा थप निगरानी बढाउनुपर्नेमा जोड दिइन् ।

जसले जे भने–

शिशिर खनाल : एक नेपाली नागरिकसहित २६ जनाको ज्यान लिने गरी पहलगाम कश्मीरमा भएको आतङ्कवादी हमलाप्रति राष्ट्रिय स्वतन्त्र पार्टी कडा निन्दा व्यक्त गर्दछ । आतङ्कवादले कसैको पनि हित गर्दैन । पहलगाम आक्रमणपछि भारत र पाकिस्तानबीच तनावको स्थिति देखिएको छ । आफ्नो छिमेकी मात्र होइन सार्कको अध्यक्षको नाताले यो क्षेत्रको शान्ति र स्थिरतमा नेपालको स्वाभाविक चासो हुनुपर्दछ । परराष्ट्र मन्त्रालयले ढिलै गरेर भए पनि हिजो साँझ सार्वजनिक गरेको आतङ्कवादविरुद्धको अडानको स्वागत गर्दै भारत–पाकिस्तानबीच युद्धको स्थिति बन्न गएमा नेपाललाई पर्न सक्ने सुरक्षा, आर्थिक र आपूर्ति शृङ्खलाको असरका साथै पश्चिम भारत र पाकिस्तानमा रहेका नेपालीहरूमाथि पर्न सक्ने प्रभावसम्मको आकलन गरी योजना निर्माणको माग गर्दछु । साथै, पाकिस्तानमा अध्ययनरत ८० जना विद्यार्थीहरूले उद्धारको अनुरोध गर्नुभएको छ, तुरुन्त उद्धार र सुरक्षाको पहल होस् । यो संसद्लाई समग्र परिस्थितिको मूल्याङ्कन र नेपाल सरकारको तयारीबारे जानकारीका लागि रुलिङ होस् भनी माग गर्दछु ।

शेरबहादुर कुँवर : केही दिनपहिले भारतको जम्मू–कश्मीर राज्यको पहलगाममा आतङ्ककारीहरूको हमलाबाट २६ जनाले ज्यान गुमाउनुपरेको दुःखद घटनाले दक्षिण एसियामा अशान्तिको सङ्केत देखिएको छ । हामी कुनै पनि खाले आतङ्कवाद र आतङ्ककारी गतिविधिका विरुद्धमा छौँ । भारत–पाकिस्तान द्वन्द्वले आइपर्ने समस्याबाट हामीले सतर्कता अपनाउनैपर्छ । लाखौँ नेपालीहरू भारतका विभिन्न ठाउँमा विभिन्न पेसा गरी बसिरहनुभएको छ भने हजारौँ विद्यार्थीहरू अध्ययनरत छन् । उनीहरूको सुरक्षा र सम्भावित घटनाहरूबाट आयातमा पर्ने असरबारे समयमै ध्यान दिनुपर्छ ।
बीना जयसवाल : भारत–पाकिस्तानबीच ‘अपरेशन सिन्दूर’ ले सिर्जना गरेको परिस्थितिप्रति गहिरो चिन्ता व्यक्त गर्न चाहन्छु । कुनै पनि धर्म, वर्ण, सिमानाभन्दा ठूलो विषय मानवता नै हो । तर, पहलगाममा भएको धर्मलक्षित आतङ्ककारी रक्तपात यस्तो युद्धको कारण बन्यो जसमा धर्म, राज्य, परिवार र मानवतालाई नै आखिरमा बलि चढ्नुपर्‍यो । सम्भावित प्रभाव हाम्रो राष्ट्रमा पनि पर्न सक्ने जोखिम प्रशस्त छ । खुला सिमाना भएकाले युद्धको चपेटाबाट भाग्ने शरणार्थी, आतङ्ककारी वा विदेशी गुप्तचरहरू समातिएको खबर आएको छ र यसलाई मध्यनजर राख्दै सुरक्षा निकायहरूलाई सशक्त बनाई सुरक्षा चेकपोष्टहरूमा थप निगरानी बढाइयोस् । नेपाल सधैँ शान्तिको पक्षमा उभिएको राष्ट्र हो र राष्ट्रिय सुरक्षामा हामी कुनै प्रकारको सम्झौता गर्न सक्ने अवस्थामा छैनौँ । साथै, नेपालको परराष्ट्र मन्त्रालयले आतङ्कविरुद्ध भारतलाई जनाएको समर्थनको स्वागत गर्दछु र नेपालको भूमि कसैको पनि आक्रमण वा प्रभावमा नपरोस्, सन्देश अन्तर्राष्ट्रिय समुदायमा पुर्‍याउन सुनिश्चित गरौँ ।